III Xornda Feminista de Muyeres en Llucha CSI

Sábadu 4 de marzu 2017, a partir de les 11:00, La LLume, c/ Nava, 1, Xixón, Asturies.

Fae ya tres años qu’entamos dende’l coleutivu de Muyeres en llucha CSI una xornada feminista onde poder falar d’esperiencies, lluches, problemes y esperances, dientro del nuestru compromisu cola memoria hestórica de muyeres y cola visualización de les muyeres lluchaores y les nuestres compañeres sindicalistes. Como poníemos na ponencia presentada y aprobada nel últimu congresu:

Les muyeres sindicalistes y feministes siguimos avanzando na llucha polos derechos de la clas obrera en xeneral, y de los derechos de les muyeres en particular, pa ello ye importante:

Dar visualización a les luches y conflictos de les compañeres, ya que normalmente somos menos visibles, tenemos más dificultá pa falar, etc…ensin susceptibilidaes. Intentando dar los pasos que mos permitan frayar con estes realidaes y meyorar el sindicatu.

Facer un análisis de la dificultá de participación de les muyeres lo mesmo nel mercáu llaboral que nes organizaciones y nel sindicatu.

Debemos d’acabar coles actitúes machistes.

Y siguir xuniendo esta llucha a les demás.

Esperamos con esti díi contribuyir a ello…

Nesta xornada vamos siguir medrando con estratexes d’autodefensa escontra les agresiones machistes, va dalu una compañera con conocimientos en defensa personal. Al igual que l’añu pasáu esti taller ye pa muyeres, nun fai falta traer ropa deportiva, val con dir vestíes de cai. Hai qu’apuntase pa poder calcular y que temos agustu nel sitiu.

Dempués del taller d’autodefensa vamos faer la xinta de traxe, un momento pa relaxar, relacionanos y garrar con ganes les actividaes de la tarde.

Entamamos la tarde con una charra-alderique Una mirada feminista a los conflictos llaborales, pa ello vamos cuntar coles compañeres trabayadores de Modultec y de les Cafeteríes del campus universitariu de Xixón, asina, vamos conocer de primera mano les consecuencies de ser muyer y trabayadora motivu pol que súfrese precariedá, despidos, amenaces, sueldos esclavistes y incluso agresiones. Dempués de la charra ye una bona ocasión pa cuntanos esperiencies, pa compartir opiniones, aldericar y ver cómo podemos enfrentanos a tola discriminación y violencia machista.

N’acabando la charra y l’alderique ye la hora de miranos pa dientro, recitanos y dexar qu’esta xornada mos cale y vaya dexándonos bon sabor de boca, pues entama la timba poética feminista y dempués hai micru abiertu, poro, si ties un testu o un poema en mente, ya seya tuyu o d’alguna muyer, nun dexes de compartilu.

El taller d’autodefensa ye non-mistu y el restu d’esta xornada ye mista, sicasí, ye importante que les persones que sufrimos anguaño la represión machista mos empoderenos nun espaciu mistu y nun se monopolicen les intervenciones nos alderiques que puean surdir p’asina tar a gustu y poder participar toes.

Aprovechamos el díi pa recoyer productos hixiénicos pa les muyeres refuxiaes Siries. Pondremos una caxa nel llocal onde podréis aportar (compreses, tampones, toallites hixiéniques, pañales infantiles y pa persones mayores,…). Esta recoyida entra dientro la campaña “Ayuda a las refugiadas” qu’organicen “El Consejo de Mujeres del Concejo de Gijón y la Asociación de Apoyo al Pueblo Sirio”.

Entamamos pela mañana a les 11:00, ¡esperámosvos!

Organiza: Muyeres en llucha CSI