La CSI denuncia la hipocresía de FORO, UGT, CCOO y USIPA respeutu a los planes d’emplegu.

Dende la Corriente Sindical d’Izquierda (CSI) denunciamos la hipocresía que, ca ún a la so manera, tán amosando’l gobiernu municipal de Foro y los sindicatos CCOO, UGT y USIPA nos últimos díes respeutu al pasáu, presente y futuru de los Planes d’Empléu.

Hipocresía la del Gobiernu Municipal de Foro y del so Director Xeneral d’Empléu, Pelayo Barcia, cuando acusen a aquelles y aquellos trabayadores que quieran denunciar la so contratación inregular y fraudulenta d’acabar colos Planes d’Empléu si les sos demandes prosperen xudicialmente, talu como yá vién pasando coles demandes y reclamaciones presentaes por centenares d’ex trabayadores nos últimos dos años. La única responsabilidá d’acabar colos Planes d’Empléu sedría del señor Barcia y del Gobiernu de Foro, que reiteradamente vienen saltándose allegremente la llexislación llaboral e incurriendo una y otra vegada en fraude de Llei. Chantaxear emocionalmente y cargar la presión social d’esta posible desapaición de los Planes d’Empléu sobre aquelles persones que acaben agora contratu ye querer cargar una llosa demasiao pesada sobre éstes, y una actitú ruin y mezquina.

Los sindicatos CCOO y UGT, nuna actitú si cabe aún más ruin y mezquina, sofiten veladamente la postura’l gobiernu municipal, afalando a les y los trabayadores a nun denunciar la so contratación fraudulenta. Poco podemos esperar de dos sindicatos que lleven décades sirviendo a los intereses de la patronal, nesti casu municipal, y non defendendo los derechos de la clas trabayadora. Nesti casu la razón pueden ser los aproximadamente 35.000€ que recibe ca ún d’estos dos sindicatos del gobiernu municipal pol so supuestu “siguimientu” de los Planes d’Empléu.

Pa finar, USIPA, que mientres años foi testigu mudu de lo que asocedía nos Planes d’Empléu de Xixón y les inregularidaes que nellos se cometíen pa, cuando gracies al trabayu empezáu por dos militantes de CSI contrataos nel Plan Inserta 2013-2014 y les sos primeres victories xudiciales, y en plena campaña de les elleiciones sindicales al Comité d’Empresa del Ayuntamientu de 2015, sumáronse al carru prometiendo a la plantilla del Plan d’Empléu de 2015 la conversión de los sos contratos n’indefiníos non fixos si votaben en diches elleiciones a esti sindicatu, pa dempués obviar esta promesa ellectoral y circunscribise namás a llevar a estes y estos trabayadores les sos reclamaciones por despíu improcedente y diferencies salariales, una batalla ganada d’antemán gracies al trabayu desarrolláu con anterioridá pola CSI y los sos servicios xurídicos. Miente USIPA tamién cuando diz que los nuesos abogaos tán rellacionados con Foro ¿pueden demostrar esi venceyu? y cuando diz que foi una quincena de trabayadores quienes empezaron esti camín en 2014. Fueron nada más y nada menos 40 quienes denunciaron el so despíu improcedente y reclamaron les diferencies salariales, y más tarde fueron cerca d’otros 100 quienes denunciaron les diferencies salariales. Y eso foi namás en Xixón, yá que la CSI llevó tamién alredor de 200 casos d’ex trabayadores de Planes d’Empléu en Grao, Salas, Siero, Uviéu, Mieres, Llangréu, Villaviciosa y Cabranes, conceyos estos últimos (nin nestos nin n’otros) onde nin apaeció USIPA pa defender los derechos de les y los trabayadores.
La imagen puede contener: 4 personas, personas de pie, multitud y exterior