Nota de prensa

Dende la CSI queremos amosar tou nuesu sofitu a les trabayadores de les cafeteríes del campus universitariu de Xixón, que nestos momentos tán somorguiaes nuna fuelga indefinida provocada por un empresariu, que nun cumple coles sos obligaciones patronales. Lleva dende Noviembre ensin pagar el salariu nin la paga extra correspondiente de Navidá a les trabayadores, tampoco paga la seguridá Social, nun apurre a el trabayadores el material necesario pa desempeñar les sos xeres y tien deldes con los provisores. Amás, tien el “valor” de someter a les trabayadores a vexames continuos, que llevaron a delles a tener qu’allegar a urxencies con agudos ataques d’ansiedá, namás pola desgracia de tener un xerente incompetente, amás de prepotente.

Dichu individuu al enterase de la fuelga indefinida, dio d’alta a cinco persones nuna fecha anterior al avisu, siendo falsu que trabayaren ellí en fecha y cola gran “casualidá” de que dalgún de el trabayadores daos d’alta son familiares d’este.

Hai que destacar que’l tratu dáu polos padres del xerente a el trabayadores, foi totalmente desaveniente. Son trabayadores que lleven munchos años nesos puestos de trabayu, dalgunes tienen 20 años d’antigüedá, y un acabante llicenciar con 23 años d’edá, una actitú totalmente altiva, ensin nengún respetu y con total falta d’humanidá, pretende enseña-yos cómo tienen que realizar el so trabayu.

La vida d’estes 9 families ta en manos de la Universidá d’Uviéu, qu’a la vista de los fechos irrefugables que fueron asocediendo, empezó los trámites pa rescindir el contratu d’esti personaxe, cuandoquier pintorescu, y totalmente incapaz de xestionar un negociu.

La Universidá recibió non yá la quexa de les mesmes trabayadores, sinón tamién la de el profesores y comunidá estudiantil.

La problemática nesti asuntu son los trámites burocráticos que trai esta rescisión, y el plazu, que podría allongar hasta 3 meses. La xerencia de la Universidá tien en el so manos tola documentación que solicitó, y yá la unviaron a los servicios xurídicos de la mesma, dando pasu a unviar l’Informe ,a día de güei, 1 de Febreru, al Conseyu Consultivu del Principáu d’Asturies, órganu que va determinar o non, la rescisión del contratu.

El problema que reparamos ye que les trabayadores y les sos families van tener que pasar otros trés meses más ensin recibir los sos ingresos. Ta claro que non tolos casos son iguales pero, económicamente y sobremanera animicamente, amenorgar ye bien importante pa estes families, yá que pasar dos meses y mediu sufriendo acoso per parte d’un impresentable, que nun sabe faer el so trabayu, ye duru mentalmente, y les sos consecuencies pudieron vese el día antes de la convocatoria de la fuelga.

Dempués de ganar una llicitación pública de la Universidá d’Uviéu pa xestionar dos cafeteríes nel campus de Xixón, fechu non entendíu per parte d’esti sindicatu, nin el cómo, nin el porqué; dempués de comunicar a les trabayadores que nun tenía dineru pa pagar la primer nómina d’Ochobre; y tres l’intentu de pidir un ERE pa menguar la plantilla, da d’alta a la so madre nel puestu d’encargada. Nun podemos más qu’esixir a la Universidá d’Uviéu, y al Conseyu Consultivu del Principáu d’Asturies, que dea tola celeridad posible pa iguar esti pergrande erru.

La presión y l’afandu a los que tán sometíes estes compañeres nun nos dexen más que da-yos tol sofitu y ayuda que dende esti sindicatu podamos brinda-yos, tantu acompañándoles día ente día dende les 8:00 de la mañana a les 17:00 de la tarde (tiempu que pasen informando a los veceros de les cafeteríes por que nun entren a consumir y atendiendo un puestu de bébores y pinchos) como nes concentraciones que tolos díes se producen delantre de la cafetería del aulariu de Viesques de 11:00 a 12:0 de la mañana.

Tamién sofitamos la creación d’una caxa de resistencia a favor de les trabayadores na conserxería del aulariu sur, edificiu onde ta una de les cafeteríes del conflictu.

Recordar que dende’l 24 de Xineru, dambes cafeteríes permanecen zarraes y ensin dar serviciu dalgunu, pero dende esi mesmu día, les trabayadores en fuelga atienden un serviciu de repartio pinchos y bébores calientes, pa estudiantes, trabayadores de la Universidá o cualquier persona que s’avere hasta l’aulariu, yá que ellxs, tamién tán sufriendo les consecuencies d’esti empresariu”. Dichu serviciu ye gratuitu pero esisten unes huches pa que les persones qu’esfruten d’él, puedan collaborar cola voluntá.

El día 27 de Xineru recibióse a les trabayadores na casa consistorial, por qu’informaren al Conceyu de Xixón del estáu actual del procesu nel que desgraciadamente tán somorguiaes.

Tamos delantre del drama de les subcontrataciones, llicitaciones y subrogaciones y por desgracia nun ye l’únicu conflictu nel que vemos somorguiaos, tenemos la plantilla de la cafetería del Grupu Covadonga, somorguiada tamién nun problema asemeyáu, motiváu por una subrogación incumplida.

El día 7 de Febreru a les 12:15 de la mañana el trabayadores del campus y del Grupu Covadonga, van dar una rueda de prensa conxunta pa informar de los sos conflictos llaborales y el día 10 de Febreru a les 19:30 van realizar un pasacalles pa informar a la opinión pública d’estos fechos.

Una vegada más, dende la Corriente Sindical d’Esquierda pide tol sofitu posible de la clase trabayadora y estudiantil, pa estes 9 trabayadores que tán exerciendo’l so derechu a la fuelga, ante los actos d’un empresariu irresponsable.

“O SALVAMOS COL ALMA COLECTIVA, O COL ALMA INDIVIDUAL VAMOS TOOS AL INFIERNU”

Luis Redondo.