COMPAÑERU GONZALÍN PRESENTE

 

Güei, 18 de xineru, fae un añu que mos falta’l compañeru Gonzalín. Pa recordalu que meyor que coles pallabres que fae un añu, na so casa, la Casa Sindical de Xixón, lxs sos compañerxs y amigxs pronunciaben nun homenaxe que xunió a varies xeneraciones, un homenaxe que xunió a mayores y mocedá, mocedá que deprendimos del so exemplu de llucha y a la qu’elli trataba como “lxs sos fíxs”.

El compañeru Gonzalín amosó durante décades el so compromisu social y políticu, tando na primer llínea d’incontables lluches: del movimientu obreru, insumisión, antiglobalización, anticapitalismu, ecolóxismu, 15M, escontra los desahucios, escontra la represión, por unos servicios públicos y de calidá,…y un llargu etc de batalles pa construyir un mundo meyor, que-y costaron bastantes detenciones y xuicios, dende la dictadura hasta’l caberu día en que les fuercies dexaronlu. D’elli deprendimos a enfrentamos a les inxusticies, formes de lluchar y sobre tolo que pa él yera lo más importante la SOLIDARIDÁ, que convirtió nuna forma de vida y de resistencia.

Combativu y solidariu pa Gonzalín la CSI foi la so casa y lxs compañerxs fuimos la so familia. Dende equí dícite que siguimos con milenta conflictos, que siguimos resistiendo y lluchando, y qu’echamoste de menos al nuestru llau, col puñu n’altu y glayando escontra les inxusticies.

Compañeru sigues con nosotrxs na llucha.

Hasta siempre.