Sortéu de los Servicios Públicos

Xueves 22 d’avientu ente les 11 y 14 h, frente a la Xunta Xeneral, c/ Fruela, 13, Uviéu, Asturies.

POR NAVIDAD, SORTEO DE LOS SERVICIOS PÚBLICOS

La dinámica mundial al respeutu de los servicios públicos ye nidia nos caberos años: deterioralos, desmontalos y regalalos a empreses amigues. Eses son les direutrices marcaes dende los FMI (Fondu Monetariu Internacional), BM (Bancu Mundial), etc… y a ello aplíquense con ponderatible enfotu los gobiernos de tol orbe. Unos con más zafiedá, otros emplegando más vaselina … pero ye innegable que los grandes partíos tán toos somorguiaos a los grandes poderes económicos, y asina nun ye esperable nenguna bona noticia pela so parte.

Nun fai falta esplayase agora nel rosariu d’ataques y retayos aplicaos tantu a los servicios emprestaos a la sociedá como a los derechos de les emplegaes y emplegaos públicos. Son públicos y evidentes y vienen sufriendose va tiempu, anque ye ciertu que nos caberos años con más roxura.

Por eso, fartos de la inxusticia que supón que siempres sían los mesmos emporios los que se beneficien d’esos regalos y eses privatizaciones, dende la Corriente Sindical d’Izquierda punximos en contautu cola ONLAE (Organización Nacional de Lloteríes), el Gobiernu d’España y el Gobiernu d’Asturies. La nuesa intención ye llograr un métodu que siquier sía más igualitariu y xustu. Asina, el próximu 22 d’avientu, xueves, coincidiendo col tradicional sortéu de Navidá, vamos dar en sortear pública y transparentemente los servicios públicos. ¡Güeyu! para bien y pa mal, claro…

En dichu eventu vamos cuntar cola presencia de:

Un representante de la ONLAE.

El Presidente del Gobiernu español, D. Mariano Rajoy.

El Presidente del Gobiernu asturianu, D. Javier Fernández.

La Conseyera de Facienda y Seutor Públicu, Dª Dolores Carcedo.

El Conseyeru de Presidencia, D. Guillermo Martínez …

Y pa cerrar l’actu, vamos cuntar cola presencia d’un amigu de los emplegaos públicos, el cantautor asturianu Nacho Vegas, que va dedicanos unos minutos con un cantar especialmente escoyíu pal momentu.

Queremos despidir 2016 con un actu al empar reivindicativu y lúdicu, que bien merecemos relaxar un pocu. Crítica, humor y música pueden dir de la mano, y asina emponer al nuevu añu con bon talante. Esperamos bonalmente que, nél tengamos novedaes (bones) al respeutive de los nuesos derechos; pero como, francamente, duldamoslo, vamos tener que siguir al pie del cañón arimando’l costazu na engarradiella poles nueses reivindicaciones.

¡VENTE PAL SORTÉU!