Contracorriente nº40

16 d'ochobre 2016

¿Por qué somos del Atlético de Madrid? Yera una pregunta que, allá pel añu 2001, un rapaz-y facía a so pá nun anunciu que tuvo abondo caláu ente l’afición colchonera. Yera una manera de sacar l’arguyu de ser del to equipu, anque nun tuvieres pasando per un bon momentu.

La clas trabayadora nun tamos pasando per un bon momentu, nun paren de recortanos derechos y la nuestra presencia na cai ye cada vez más pequeña.
Malcom X dicía que «si nun tais preveníos ante los medios de comunicación, van facevos querer al opresor y odiar al oprimíu».

Y neso tán. Recórtennos sueldos, pensiones y servicios públicos mentes la mayor parte de la población queda hipnotizada énte la televisión llegando inclusive a simpatizar con tertulianos de medio pelo y políticos que faen análisis munches veces ensin nengún tipu de rigor, onde nos tresmiten que vamos vivir peor, que ye inevitable. El mensaxe va calando y les persones interioricen que nun hai otru remediu, inclusive lleguen a entender a los xestores de les sos desgracies. Fáennos creyer que movilizanos, protestar, salir a la cai a defender los nuestros derechos ye d’otra dómina, d’otru tiempu.

Criminalicen les poques protestes sociales y endurecen les lleis pa erradicales mentanto, de manera xeneral, la pasividá apodéra lo too.Nesti puntu, y de manera asemeyada al rapaz que-y pregunta a so pá por qué yera del Atlético de Madrid, podríemos preguntar ¿por qué somos de la CSI?

Ye verdá, y falóse nesti VII Congresu, que nos gustaría tener más militancia, meyor
organización, meyores locales… y too llegará. Pero nun ye menos verdá que somos un sindicatu arguyosu de la nuestra clas, que nun dexamos a naide tiráu, que nun firmamos despidos de compañeros, que nun negociamos, lo qu’otros dicen que ye negociar, trancar empreses por un poco más de dineru. Sentímonos arguyosos de pertenecer a una organización que, con tolos sos defectos, nun cansa de lluchar y de tar na cai en busca d’una xusticia social que nos nieguen.

Y, al revés que los pregoneros del reinu, nós dicimos qu’hai que dexar esti estáu d’hipnosis xeneral, hai que sumar y hai que salir a la cai a recuperar los nuestros derechos. Que nun nos engañen: otra sociedá ye posible.