Respeutu a la Ufierta d´Emplegu Públicu 2016

L’Alministración presentó a la Mesa Xeneral de Negociación la ufierta d’empléu públicu de 2016, que consiste, pal personal funcionario, en 87 places llibres y 45 de promoción interna, y, pal personal llaboral, en 38 places en vez llibre y 90 de promoción interna, que se van atropar a la vez llibre namás nel casu de nun se cubrir por promoción interna.

Esta ufierta ye absolutamente insuficiente pa les necesidaes de l’Alministración y totalmente risible al respective de les places vacantes esistentes, que, según la Llei 3/1985, de 26 d’avientu, tienen de conformar “la ufierta d’empléu de l’Alministración del Principáu d’Asturies nel exerciciu correspondiente” (art. 40). L’Alministración nun nos ufiertó datos precisos de les vacantes esistentes, nin tampoco del conxuntu de places que quedaron vacantes en 2015 y que constituyiríen el techu establecíu pola llamada “tasa de reposición”, pero envaloramos, según los datos del últimu concursu, qu’esisten en redol a 1500 vacantes llaborales y 500 funcionaries, polo que’l porcentaxe d’interinidá del personal llaboral ye del 33,3 %, esto ye, la tercer parte; bien percima de lo razonable. Y lo qu’ufierten cubrir con esta OEP ye, nel meyor de los casos, el 8,53 % de les places interines en llaborales y el 17,4 % en personal funcionario. A les clares, una miseria. Ye entá más miserable teniendo en cuenta que ye la primera que se convoca nel ámbitu de l’Alministración Autonómica dende 2009, y l’anterior foi en 2006 y nun se llegó a executar na so totalidá.

La xustificación na “tasa de reposición” ye totalmente insuficiente, cuidao que nun s’ufierten datos precisos de cuál sería’l techu que legalmente l’Alministración del Principáu nun puede superar (baxes de 2015), y que, per otra parte, son munchos los colectivos afeutaos que cunten con una tasa de reposición del 100 % y la posibilidá de treslladar y atropar places. Como n’otres cuestiones, ye una escusa que’l Gobiernu del Principáu d’Asturies utiliza pa, escudándose na normativa estatal del PP, executar la so propia política de precarización de les condiciones de trabayu de lxs empleadxs públicxs en función de los sos propios intereses.

La OEP 2016 pon de manifiestu, una vegada más, l’interés del gobiernu asturianu de caltener una alta tasa d’interinidá nes sos plantiyes, que supon caltener un colectivu de trabayadores/as que nun pueden exercer dafechu los sos derechos, nin la llibertá ya independencia que s’esixe a lxs empleadxs públicxs, cuidao que tán subjetivamente primíos pa responder con docilidad a cualquier esixencia que se-yos plantege y colos que se fraya sistemática y permanentemente los principios d’igualdá, méritu y capacidá que tienen de rexir l’accesu a la función pública. Entá ye más cuando, en reacción d’oposición y rebeldía a una sentencia xudicial, l’alministración comunicó apocayá a los sindicatos la so decisión de dexar de llamar dende’l primeru de la llista de personal interino cuando s’ufierta un contratu de cimera categoría, que l’alministración namás reconocía al contratu relevo (la sentencia diz que teníen de faer lo mesmo cuando se tratara d’una vacante), dando pie a tou tipu de corruptelas y trapicheos pa faer coincidir los contratos bonos” con persones a les que puede llega-yos información privilexada. Esto sumáu al personal de “llibre designación” empiora claramente la democratización de los servicios públicos

Per otra parte, cuntar con una tasa alta d’interinidá facilita al gobiernu siguir cola so política de privatización sistemática y tapada de los servicios públicos que llevamos reparando dende va años y que se da en tolos niveles profesionales: dende les consultoríes encargaes a empreses esternes, que podríen y tendríen de ser llevaes a cabu por emplegaos/as públicos/as cola especialización necesaria, de los qu’en munches ocasiones disponse, hasta la subcontratación de los servicios de llimpieza, pasando pola “externalización” de servicios esenciales como ye l’atención a les persones más vulnerables (ancianxs, menores, enfermxs) en numberoses entidaes privaes: Unidaes d’Atención Temprana, xeriátricos, cases d’acoyida, sanidá, etc.

Nun fai falta ser bien mal pensaos p’abarruntar qu’hai una relación ente la decisión de faer una ufierta d’empléu ridículamente pequena y tener les manos llibres pa siguir nel procesu privatizador. Entá ye más cuando mientres años y años l’Alministración negóse a entamar el procesu de revisión del Catálogu y de la R.P.T. necesariu pa realizar un procesu de modernización de l’Alministración axustáu con lxs empleadxs públicxs, con abonda planificación pa prever y faer posible la formación de los as mesmos as p’afaese a les esixencies actuales del serviciu públicu.

En xunto, la política de personal que se reflexa nesta Ufierta d’Empléu Públicu 2016, que, amás, presentar a la Mesa Xeneral de Negociación ensin diálogu previu sectorial, ye una política que sigue dando espaciu a la corrupción, el nepotismu, la improvisación y, en xunto, el deterioru y esmantelamientu de los servicios públicos

Por tou ello, dende la Corriente Sindical d’Izquierda ESIXIMOS a l’Alministración:

1. Que publique los datos reales de vacantes xenerales y de les producíes cada añu (base de la tasa de reposición), identificando y axustando con lxs representantes de lxs trabajadorxs cuálos son los sectores prioritarios.
2. Qu’amplíe la OEP de manera sustancial de manera qu’amenorgue significativamente la tasa d’interinidá tantu en personal llaboral como funcionariu.
3. Que convoque yá a lxs representantes de lxs trabajadorxs a la negociación y revisión del Catálogu y de la Relación de Puestos de Trabayu pa poner en marcha los procesos de formación efectivamente afechos a les necesidaes del serviciu públicu.
4. Que cumpla colos principios de Méritu, Igualdá y Capacidá.

Estos son pasos imprescindibles non yá pa la dignidá de lxs empleadxs públicxs, sinón
pa la calidá y ética del serviciu públicu, que pasa pola cualificación, estabilidá, promoción
y participación de lxs trabajadorxs; esto ye, por una política de personal seria