Sigue’l saquéu de Cajastur

“L’executivu modernu cobra un salariu monstruosu por cinxise a tres principios: protexese a sigo mesmu y a la so redolada, catar al veceru hasta que sangre y, de terceres, xenerar beneficios pal accionista, anque si nun los xenera aplícase’l primer principiu” Aeropuertu, Enric González

Los últimos movimientos bursátiles en redol a Liberbank per parte de los grupos especuladores que tán faciéndose, a preciu de saldu, colo que foi nuesa Caxa constitúin una clara demostración de que tol procesu de privatización de Cajastur ye un exemplu de llibru de saquéu del patrimoniu de toos pa beneficiu d’unos pocos.

Les noticies publicaes alrodiu de la compra per parte de la Corporación Masaveu de más acciones de Liberbank y sobre el pesu d’esi grupu de la oligarquía asturiana y de los fondos d’inversión mexicanos nel accionariado del bancu son la meyor prueba de les maniobres especulatives amestaes al procesu de privatización/lliquidación de Cajastur, cola impagable (o non tantu) ayuda de los directivos que pilotaron tou esti procesu de saquéu.

Nun resulta inocente, en tou esti espoliu, la cayida en bolsa de Liberbank (un 66% dende xineru d’anguaño, ensin que, cómo sería lo lóxico, poner de patitas na cai a los sos directivos) que dexa esti tipu d’esguilaes nel control del bancu a preciu de saldu, depreciando, amás, el valor de les acciones que tien la Fundación Bancaria Cajastur (el 30%) y el restu de les Fundaciones Bancaries provenientes de les antigües caxes.

A resultes de toes estes maniobres especulatives, ente la oligarquía asturiana que nel so momentu vendió al meyor postor la banca privada rexonal pa dedicase a otres actividaes más especulatives y muncho más codaloses y ente los fondos especulativos mexicanos suman el 15% de les acciones de Liberbank, la metá de les que tien la Fundación Bancaria Cajastur, heredera de la Caxa d’Aforros d’Asturies (30%) y más de les que tienen les Fundaciones Bancaries de Caxa d’Estremadura (9%) y de Caja Cantabria (6%)

Resulta evidente que lo que menos interesa a estos grupos económicos ye la viabilidá a mediu y llargu plazu de la entidá y, por tanto, de los puestos de trabayu y tamién resulta evidente que l’equipu directivu de Liberbank ta desenvolviendo una política que na más favorez los intereses d’esos grupos especuladores.

Ye necesariu, por tanto, siguir cola denuncia d’esti monumental atracu y cola protesta contra’l procesu de privatización/lliquidación de Cajastur.

En Xixón denuncióse’l peslle d’oficines.

El plan de reestructuración va más allá d’un simple axuste más de plantiyes, yá que va suponer el peslle de 36 oficines de l’antigua Cajastur en Asturies
y el pase a oficines d’autoserviciu, esto ye, solamente con caxeros, d’otres 20.

Esti plan de reestructuración va suponer qu’echen el peslle de oficines de Cajastur de pueblos como San Juan de Beleñu, Colombres, Martimporra, Campu Casu, Taramundi, Arenas de Cabrales, Castropol, Pola de Somiedu o Zarréu, capitales toos ellos de los sos conceyos.

Pero tamién se van cerrar oficines en La Espina, Cancienes, Rir, Sevares, Tormaleo o Tiuya.

Y al pie de elles, seis n’Uviéu, nueve en Xixón, otros dos n’Avilés, dos más en La Felguera y Sama, otra más en Mieres.

Y ello xuníu a les 20 oficines que cierren les sos puertes al públicu pa convertise n’oficines d’autoserviciu con caxeros como prestación única. Siete n’Uviéu, nueve en Xixón y los cuatro del plan piloto d’Avilés.