Manifestación pola igualdá real de toles persones “Orgullosamente visibles”

Dende la CSI llamamos a participar na manifestación del Día del Arguyu LGTB (28 de xunu) qu’esti añu cellébrase’l sábadu 25 de xunu y recorrerá les cais de Xixón glayando polos drechos de toles persones.

El sábadu ye’l día de la reflexión, pero munches persones nun tenemos na que reflexionar y tenemos claro que siempre vamos tar na cai y defender los drechos de toles persones.

Na CSI ratificámonos una vez más nel testu políticu “Entamar” qu’escribimos ente toes y toos va ya tiempu, y na so parte de Igualdá. A continuación vos dexamos un estractu d’esi testu y volvemos a llamavos a participar na manifestación:

“Dende la CSI creyemos na necesidá de constuyir otra sociedá, basada na igualdá ral de toles persones y na xusticia social. Una sociedá onde les categoríes qu’imponen el capitalismu y l’heteropatriarcáu seyan cosa del pasáu y ca persona puea elexir llibremente la so vida, ensin que se vulneren los sos drechos o seya discriminada, perseguida, maltratada o asesinada.

Dende la CSI nun toleraremos enguna muestra de machismu racismu y logtfobia, y creyemos que ye obligación de toes y toos trabayar en comuña p’acabar con estes llacres sociales. Como organización d’izquierda está obligada a terminar coles desigualdaes qu’impone a la calse obrera un sistema asesinu, qu’apoyase nes nuestres diferencies pa separtanos, dividinos y asina poder pisanos meyor.

[…] Como sindicatu de clase lluchamos polos drechos que mos correspuenden a toes y toos y pa construyir un nuevu modelu llaboral y social. Nun consentiremos nengún tratu discriminatoriu, nin dientro nin fuera del trabayu. Toles persones debemos tener unos drechos xusta y que se respeten. La llucha pola igualdá debe contemplar tolos aspectos de la vida.”

Por too esto y por más razones taremos na cai glayando…

¡Contra les discriminaciones SOLIDARIDÁ!

¡TOLOS DRECHOS PA TOLES PERSONES!