Manifestación en defensa de los puestos de trabayu y la viabilidá de les plantes d’Arcelor. Somos solidarixs y vamos a demostralo

CSI-ARCELOR (ASTURIES)

NESTA MANIFESTACIÓN VAMOS CUNTAR COLA ASISTENCIA DE LOS COMPAÑEROS Y COMPAÑERES DE ZUMÁRRAGA Y SESTAO

ENTAMEN: CORRIENTE SINDICAL D’IZQUIERDA, COMITÉ D’EMPRESA D’ARCELOR-ZUMÁRRAGA Y COMITÉ D’EMPRESA D’ARCELOR-SESTAO

El 11 Xunu convocámosvos a toos y toes n’Avilés pa realizar una xornada de protesta conxunta colos compañeros y compañeres de Zumárraga y Sestao, a quien Mittal ta furtiándo-yos los sos puestos de trabayu y emponiendo a la espulsión de los sos llugares de vida, de les sos tierres.

Puestos de trabayu sumíos y que tán siendo furtiaos tantu nes factoríes de Euskal Hería, como nes de Madrid, Asturies y ellí onde tean asitiaes.

Una protesta énte’l zarru anunciáu de les factoríes de Zumárraga y Sestao, por un plan industrial pa toles plantes del Estáu, pa la reinversión de los beneficios nes contornes y escontra la política d’amenaces y chantaxes que practica na totalidá de plantes asitiaes nel Estáu español.

Amenaces y chantaxes qu’esibe con total impunidá, faciéndose posesor de la facultá de dirixir el destín de miles de trabayadores.

Amenaces y chantaxes en forma de posibles inversiones en cuenta de ceder y ceder los pocos derechos de los y les trabayadores, pa qu’una vegada yá estrumíos sían tiraos a la basoria.

Amenaces de zarros indiscriminadamente.

¡Abasta yá!. Tenemos de realcontranos cola nuesa conciencia de trabayadores y desixir d’una vegada a tolos actores políticos, sindicales ya instituciones sociales que nun se dexen amedranar polos caprichos y les enganíes de beneficiu personal escomanáu d’estes multinacionales, dirixíes por cúpules direutives ensin dengún tipu d’escrúpulos, conciencia, nin alma; xugando asina colos seres humanos como si fueren simples peones d’un tableru d’axedrez.

Tenemos de desixir; pero lo que ye mas importante entá, corresponsabilizanos, dando un pasu al frente y xenerando llazos y venceyos colos nuesos compañeros y compañeres, pos lo que güei tán viviendo ellos y elles lo mas probable ye que lo vivamos nós mañana en primer persona.

Nun nos dexemos engañar polos métodos usaos pa xenerar una disputa ente los y les trabayadores, faciéndonos creer milenta de falacias arramaes p’algamar la desunión.

D’esto encárgase la empresa coles numberoses ferramientes mediátiques y cola so xente asitiada n’espacios y foros que tendríen d’ocupar compañeros y compañeres con un pensamientu real de defensa de los y les trabayadores.

Y, d’una vegada por toes, dicir al altu la lleva que nun precisamos a salva-empreses veníos de llares alloñaos y paraísos fiscales.

Tenemos de safanos d’una vegada d’esti xugu opresor y tener bien claro qu’estes factoríes tienen de siguir con o ensin inversión privada. La esplotación al cargu de manos privaes tien de llevar amestáu un compromisu fehaciente de reinversión de parte de los beneficios nes factoríes y les rexones onde s’asienten.

De nun ser asina, ¿que dulda cabo que la xestión tien de correr a cargu del interés xeneral de la ciudadanía y de esa manera nunca tar supeditaos a los antoxos especuladores de ciertos grupos empresariales?. Les factoríes son nueses y tán asitiaes nes nueses tierres.

Por SOLIDARIDÁ y pol refugu al nengunéu al que tamos siendo sometíos toos y toes, tenemos d’allegar conxuntamente a la movilización entamada pal sábadu 11 xunu, a les 12:00 h., na plaza’l Vaticanu d’Avilés.