Comunicado del Colectivo de Intérpretes de Lengua de Signos: recortes y represalias

CSI-INTÉRPRETES DE LLINGUA DE SIGNOS (ASTURIES)

El pasáu 7 xunu aprebóse na Xunta Xeneral d’Asturies una Proposición non de Llei qu’encamienta al Gobiernu a nun prorrogar el serviciu d’intérpretes de Llingua de Signos pa l’atención al alumnáu sordu a l’actual axudicataria’l serviciu por cuenta de les condiciones llaborales nes que caltien a les y los intérpretes y a dar los pasos oportunos pa la creación d’una bolsa pública d’empléu pa estes y estos profesionales.

Nel momentu en que al Grupu Parlamentariu Socialista-y tocó afitar la so posición, que, por cierto, foi votar a la escontra, esto ye, amosase a favor de caltener el serviciu demientres el viniente cursu na mesma llamentable situación qu’hasta agora; Elsa Pérez, vocera’l PSOE na comisión d’educación afirmó: “Empiezu refugando categóricamente qu’esista nengún tipu de represalia per parte la Conseyería d’Educación y Cultura nin con estos trabayadores nin con nengún otru”. Magar esta declaración, tamos en disposición d’afirmar que la Conseyería d’Educación tien previstu otru hachazu al alumnáu sordu y a les y los profesionales que lu atendemos.

El viniente 21 de xunu vamos pasar a engrosar les llistes del paru. En casu de que nos reincorporemos a los nuesos puestos de trabayu’l día 12 setiembre (daqué qu’inda ta nel aire), les nueses xornaes llaborales van amenorgase drásticamente, polo que los nuesos salarios yá nun van algamar nin los 400 euros. Si esto nun son represalies qu’espliquen a qué debe esta amenorgamientu de recursos. De fechu foi la tónica habitual desque en xunu de 2015 seis trabayadores decidieren interponer una demanda escontra la Conseyería d’Educación y escontra Adecco. D’aquellos seis trabayadores, güei namás tán n’activu cuatro, y fueron esos cuatro quien más vieron amenorgada la so xornada llaboral.

A naide tien d’escapáse-y amás qu’esti amenorgamientu de les nueses xornaes supón qu’al alumnáu sordu suprímen-y el so más básicu recursu d’accesibilidá. Como bien escribía daquién ayeri n’El Periódicu de Catalunya “¿daquién plantegaríase namás ufiertar dellos recursos a un neñu ciegu?”. Esto ye precisamente lo que tán faciendo nes aules asturianes col alumnáu sordu, ¿cómo pretenden qu’aporten a los conteníos de les clases si namás cunten colos sos intérpretes demientres unes poques hores al día?, ¿qué clases tenemos de priorizar: llingua, matemátiques, conocencia’l mediu, educación física,…? Obviamente a toes nun podemos entrar y, menos entá, de magar l’añu que vien si se cumple, como la Conseyería tien previstu, que la presencia de les y los intérpretes s’amenorgue a 15 hores selmanales.

Señores de la Conseyería: una persona sorda ye sorda les 24 hores del día, ¿asocederíase-yos a ustedes, por poner un exemplu, facilitar material en Braille a un alumnu ciegu namá de 9 a 11 y quita-ylu de magar esa hora? ¡Ye precisamente eso lo que tán faciendo col alumnáu sordu!

La Llei 27/2007, de 23 d’ochobre, pola que se reconocen les llingües de signos y regúlense los medios de sofitu a la comunicación oral de les persones sordes, con discapacidá auditiva y sordociegas, recueye lo siguiente: “Les Alministraciones educatives van facilitar a les persones usuaries de les llingües de signos el so usu como llingua vehicular de la enseñanza nos centros educativos que se determinen”. Resulta evidente qu’esto nun ta cumpliéndose.

A lo cabero queremos dicir altu y claro que van poder intentar amenorganos xornaes, mandanos a la Conchinchina por cuatro duros o nun contratanos l’añu que vien por haber llucháu por camudar esta pésima situación, pero nun vamos callar porque queremos poder vivir del nuesu trabayu ensin tener que pidir dineru emprestao a naide y porque creemos xustu y necesariu que l’alumnáu sordu pueda esfrutar d’un sistema educativu que nun lu discrimine.