Una nueva executiva pa una nueva dómina

Compañeres y compañeros, esti fin de selmana foi’l VII Congresu de la Corriente Sindical d’Izquierda y dende la nueva executiva queremos mandavos un saludu.

Sabemos que tenemos un llargu camín per delantre y munchos retos: reorganizar el sindicatu y afaelo a la nueva realidá sociu-económica, formanos sindical y políticamente ente toxs, reforzar aquellos sectores o árees que más lo precisen, aldericar, compartir con otres organizaciones espacios y engarradielles, arimar la solidaridá, siguir na llucha tolos díes,…y faer qu’esti sindicatu sía un verdaderu motor de cambéu social.

Detrás táis tola afiliación y militancia que lleváis más de 30 años engarrando y faciendo d’esti sindicatu un referente obreru tantu en Asturies como nel restu del Estáu español. Esperamos siguir col vuesu sofitu y cuntar cola vuesa esperiencia. Pa nosotrxs ye fundamental que teáis ende construyendo al nuesu llau esti nuevu camín, allongamientu del qu’heredamos de vosotrxs.

Del nuesu llau ponemos ilusión, ganes de trabayar, compromisu y responsabilidá. Creemos qu’ente toes y toos podemos ameyorar la nuesa organización por que siga siendo una ferramienta de les y los trabayadores contra’l capital, y sobremanera la casa de la clase obrera.

Compañeres y compañeros abrése ante nosotrxs una nueva dómina y munchos retos, pa los que precisamos tar xuníos y trabayar toxs. Namá col compromisu y el trabayu de tola afiliación vamos poder enfrentanos a les dificultaes, a les torgues y reforzar a la nuesa clase. Toxs somos parte de la Corriente Sindical d’Izquierda, tolxs que tamos preocupaxs por meyorar y tirar p’allantre, y debemos militar dende l’arrogancia, cola solidaridá como bandera. Porque XUNTXS FACEMOS LA CSI, equí arrinca una nueva dómina pa esti sindicatu de clase, combativu, asturianu, feminista ya internacionalista.

¡PUXA LA LLUCHA DE LA CLASE OBRERA!

¡PUXA LA CSI!

La nueva executiva de la CSI somos:

– Nachu Fuster (Vauste, antigua Tenneco)
– Pilar del Álamu (Desemplegada)
– Fernando Álvarez (Vauste, antigua Tenneco)
– Ana Fernández, (Modultec)
– Daniel Herrero (HP Uviéu)
– Adán Fernández (Samoa)
– María Fernández (ERA)
– José Ramón Estévez (Liberbank)
– Raquel Fernández (Despidida Aytu. Santu Adrianu)
– Aurelio Fanjul (SESPA Área V)
– Élida Alonso (ERA)
– José Manuel García (Thyssem Krupp Norte)
– Xaime Aranda (Desemplegada)
– Nuria Vidal (Parada)
– Xuan Xesús Gonzalez (Arcelor)
– Raúl Álvarez (Hunosa)
– Mónica Jiménez (Desemplegada)
– José Luis Sahagún (EAP)
– Alonso Gallardo (Jubiladxs)

En curtiu van incorporase a esti grupu 3 persones más, representantes de les llocalidaes d’Uviéu, Mieres y Avilés.

Vemos.
Un saludu.