Xuiciu por unes condiciones llaborales dignes de les y los intérpretes de Llingua de signos

COLEUTIVU D’INTÉRPRETES DE LLINGUA DE SIGNOS

El Coleutivu d’Intérpretes de Llingua de Signos pal alumnáu sordu demandó a la Conseyería d’Educación y a la Empresa de Trabayu Temporal Atlas-Adecco:

-Porque la Conseyería d’Educación nun debe delegar dengún aspeutu de la Enseñanza, muncho menos l’Atención a la Diversidá, n’empreses privaes. La Educación tien de ser pública tamién pal alumnáu sordo.

-Porque la Conseyería d’Educación nun tendríe de dexar que les ETTs fixeren negociu na Educación Pública.

-Porque somos personal especializáu, pero púyennos, al traviés d’Empreses de Trabayu Temporal, como a moblame, con sueldos de miseria y ensin derechos llaborales.

-Porque ADECCO ye l’alxudicataria’l serviciu, pero lléndase a cobrar la llicitación y desentendiéndese dafechu de l’afayaíza xestión del Serviciu, causando, con ello, una grave discriminación pal alumnáu sordo.

Los y les trabayadores intérpretes de llingua de signos pal alumnáu sordu entamaron movilizaciones pa reivindicar unes condiciones dignes de trabayu

Les movilizaciones van siguir hasta’l viniente 26 de mayu, día nel que va tener llugar la vista’l xuiciu pola demanda de estos y estes trabayadores escontra la Conseyería Cultura y la Empresa de Trabayu Temporal “Atlas-Adecco”.

COMUNICÁU DEL COLEUTIVU D’INTÉRPRETES DE LLINGUA DE SIGNOS D’ASTURIES

El coleutivu d’Intérpretes de Llingua de Signos qu’emprestamos los nuesos servicios nos centros educativos sosteníos con fondos públicos, queremos denunciar, una vegada más, que la Conseyería d’Educación caltién a los y les intérpretes de llingua de signos pal alumnáu sordo na esclavitú llaboral dafechu. Con contratos miserables al traviés de les Empreses de Trabayu Temporal, dexando qu’empreses privaes faigan negociu nos centros educativos asturianos, recibiendo dineru públicu por xestionar nómines y caltener a los y les sos trabayadores nuna más que cuestionable llegalidá.

La Conseyería d’Educación caltién, d’esta forma, unes condiciones llaborales intolerables pa los y les profesionales, con salarios de 400 € al mes, despidos arbitrarios y la más absoluta indefensión énte l’ausencia de cualisquier triba de derechu llaboral.

Esto ta acarretando condiciones llaborales pésimes pa los y les profesionales (salarios de 400 € al mes, concatenación de contratos temporales, tres meses ensin trabayu al añu,..) y graves defeutos na atención al alumnáu que precisa de los nuesos servicios p’aportar al currículum n’igualdá de condiciones que los sos compañeros y compañeres oyentes.

Y nun son namás los y les intérpretes de llingua de signos quien queden abandonaos y abandonaes a la so suerte, sinón tamién el mesmu alumnáu sordu, que solo esfruta de l’asistencia d’intérprete demientres una parte la xornada lectiva, con tolo qu’ello supón de discriminación y d’ausencia d’igualdá d’oportunidaes frente al alumnáu non sordu.

Teniendo en cuenta que desendolcamos el nuesu llabor en coordinación col equipu docente y col departamentu d’orientación, siguiendo direutrices d’ésti y del Equipu Rexonal pa l’atención al alumnáu con necesidaes específiques de sofitu educativu; desiximos a la Conseyería d’Educación que pongan fin a la cesión illegal y subcontratación de los y les intérpretes.

Desiximos, en concreto, lo que vien darréu:

-Incorporación a la plantía de Personal Llaboral de l’Alministración Asturiana.

-Xornaes llaborales completes que recueyan les hores d’atención direuta col alumnáu, les hores de preparación de materiales y vocabulariu y les hores de coordinación col restu del equipu educativu.

-Contratos añales y non por cursos académicos.

-Reconocencia de l’antigüedá nel desempeñu de les nueses funciones con calter retroactivu.

Hasta la puesta en marcha d’estes midíes, solicitamos, con calter urxente, que nun se prorrogue l’alxudicación d’anguañu, que remata esti cursu, y se ponga en marcha la convocatoria d’un nuevu concursu nel que s’ellaboren unos pliegos de condiciones qu’eviten la precarización que venimos sufriendo. Estos nuevos pliegos han de garantizar:

-Subrogación del personal en casu de cambéu d’empresa.

-Aplicación del Conveniu Coleutivu Xeneral de Centros y Servicios d’Atención a Persones con Discapacidá, onde se recueye la nuesa categoría profesional y un salariu mínimu garantizáu.

-Xornaes llaborales completes que recueyan les hores d’atención direuta col alumnáu, les hores de preparación de materiales y vocabulariu y les hores de coordinación col restu l’equipu educativu.