Despidíos, en plenu procesu eleutoral, dos candidatos de la CSI a les elecciones sindicales na empresa Plata Servicios, Llimpieces Plata

CSI-PLATA SERVICIOS / LLIMPIECES PLATA (AVILÉS. ASTURIES)

(SUBCONTRATA DE SAINT GOBAIN / CRISTALERÍA)

LOS DESPIDÍOS SON, AMÁS, LOS RESPONSABLES DE LA SEICIÓN SINDICAL DE LA CSI NA EMPRESA

En plenu procesu eleutoral, coles candidatures yá presentaes y cola fecha d’eleiciones afitada pola mesa eleutoral pal viniente 1 de xunu, vienen de ser despidíos dos militantes de la Corriente Sindical d’Izquierda, que se presentaren como candidatos pa les mentaes eleiciones sindicales.

Dase, tamién, la ¿casualidá? de qu’estos dos trabayadores yeren los responsables de la Seición Sindical de la CSI na empresa avilesina Plata Servicios / Llimpieces Plates.

Estos dos trabayadores, xunta’l restu la Seición Sindical de la CSI, taben somorguiaos, dende va meses, nuna dura engarradiella escontra la Direición de la empresa, pola mor de la cascada despidos inxustificaos y los intolerables abusos empresariales que taben teniendo llugar na empresa.

Tanto ye asina, qu’estes eleiciones sindicales presentábense como una esperanza pa munchos y munches y trabayadores que víen apeligrar el so puestu trabayu y la so forma de ganase la vida.

Dende la Corriente Sindical d’Izquierda n’Avilés vamos anunciar, esta mesma selmana, les midíes llegales y movilizaciones que vamos entamar y que nun van parar hasta la realmisión de los nuesos compañeros y la celebración de les eleiciones sindicales con ellos como candidatos.

(Semeya de les oficines de Plata Servicios, asitiaes na cai Manuel Pedregal d’Avilés. Plata Servicios ye una empresa que cunta con divisiones de Llimpieza, Xardinería, Servicios Auxiliares a Empreses, etc. En concretu, los compañeros de la CSI despidíos trabayen na subcontrata que Plata Servicios caltién en Saint Gobain / Cristalería, reparando y atendiendo el control de calidá de los parabrises utilizaos na fabricación d’automóviles).