1 de Mayu manifestación “Nin crisis, nin mordaces, nin guerres…¡Solidaridá!”

ENTAMEN: CORRIENTE SINDICAL D’IZQUIERDA (CSI), CXT, SUATEA.

Esti 1u Mayu volvemos a salir a la cai por toles inxusticies que sofrimos la clas obrera. Porque mos quieren ensin drechos, en silenciu, con mieu y en casa pero nun lo van consiguir. Nun sólo nun quedamos en casa nin guardamos silenciu sinon que xuntes/os desiximos la derogación de la Reforma llaboral, la Llei mordaza y la Llei d’extranxería, la reducción de la xornada llaboral, la erradicación del Terrorismu machista y del terrorismu patronal, la igualdá de drechos pa toles persones y el fin de les guerres.

Saldremos a la cai pa desixir tamién la llibertá y l’absolución de les persones encarcelaes, con miles d’euros en multa ya imputaes por lluchar polos drechos de toes y de toos. Nun vamos aguantar más montaxes policiales, nin más criminalización de la protesta. Nun somos nosotres les que tenemos de tar na cárcel. Son tolxs corruptxs, son tolxs que s’enriquecen vendiendo armes, y llueu zarren fronteres, tolxs que s’enriquecen recortando en medies de seguridá nos trabayos, acabando coles nuestres vides.

Tamos fartes de que los nuestros drechos desapaezcan. Un trabayu dignu, una vivienda, un hospital, una escuela, la universidá, inclusive les medicines, la eletricidá o’l gas, l’alimentación,… entamen a tornase en luxos que la clase trabayaora yá nun podemos permitinos. La nuestra precariedá y la nuestra misera son los pegoyos del so bienestar. Pero tamién del nuestru malestar, malestar que sofrimos dende va demasio tiempo yá.

Basta de paru, precariedá, zarros d’empreses, acosu llaboral, despidos, terrorismu patronal, represión, racismu y xenofobia, corrupción, retayos sociales (n’educación, sanidá, servicios sociales,…), violencies machistes, fascismu, desahucios, lgtbfobia, desigualdaes y discriminaciones, valles, alambraes, fronteres,…y un llargu etc d’inxusticies. Nun queda otra, hai qu’acabar con too esto.

Por eso lluchamos, pa construyir una socieda llibre, xusta ya igualitaria pa toes y toos.

Esti 1u Mayu, como tolos díis, volveremos a tar na cai defendiendo una forma de facer sindicalismu basada en la resistencia y na solidaridá. Un sindicalismu asambleariu, non centrao nes urnes, sinon nel trabayu y l’esfuerzu del díi ente díi. Ensin lliberaciones y ensin unes cúpules corruptes y traidores. Un sindicalismu que lluche polos puestos de trabayu y polxs compañerxs y non los venda nin firme despidos y zarros d’empreses. Un sindicalismu que de verdá defienda los drechos de la clas obrera y acabe colos responsables de les inxusticies: el capitalismu, los sos gobiernos, la so banca y la so patronal.

Ayer, güei y mañana glayamos ¡VIVA LA LLUCHA DE LA CLASE OBRERA!