Comunicáu del Colectivu trabayador y trabayador Intérpretes de Llingua de Signos de Asturies

CSI-INTÉRPRETES DE LLINGUA DE SIGNOS

El coleutivu d’Intérpretes de Llingua de Signos qu’emprestamos los nuesos servicios nos centros educativos sosteníos con fondos públicos, queremos denunciar, una vegada más, que la Conseyería d’Educación xestiona esti serviciu al traviés d’una subcontrata, dexando qu’empreses privaes faigan negociu nos centros educativos asturianos.
Esto ta acarretando condiciones llaborales pésimes pa los y les profesionales (salarios de 400 € al mes, concatenación de contratos temporales, tres meses ensin trabayu al añu,..) y graves defeUtos na atención al alumnáu que precisa de los nuesos servicios p’aportar al currículum n’igualdá de condiciones que los sos compañeros oyentes.
Teniendo en cuenta que desendolcamos el nuesu llabor en coordinación col equipu docente y col departamentu d’orientación, siguiendo direutrices d’ésti y del Equipu Rexonal pa l’atención al alumnáu con necesidaes específiques de sofitu educativu; desiximos a la Conseyería d’Educación que pongan fin a la cesión illegal y subcontratación de los y les intérpretes.
Desiximos, en concretu, lo siguiente:
-Incorporación a la plantía de Personal Llaboral de l’Alministración Asturiana.
-Xornaes llaborales completes que recueyan les hores d’atención direuta col alumnáu, les hores de preparación de materiales y vocabulariu y les hores de coordinación col restu del equipu educativu.
-Contratos añales y non por cursos académicos.
-Reconocencia de l’antigüedá nel desempeñu de les nueses funciones con calter retroactivu.
Hasta la puesta en marcha d’estes midíes, solicitamos, con calter urxente, que nun se prorrogue l’alxudicación d’anguañu, que remata esti cursu, y se ponga en marcha la convocatoria d’un nuevu concursu nel que s’ellaboren unos pliegos de condiciones qu’eviten la precarización que venimos sufriendo. Estos nuevos pliegos han de garantizar:
-Subrogación del personal en casu de cambéu d’empresa.
-Aplicación del Conveniu Coleutivu Xeneral de Centros y Servicios d’Atención a Persones con Discapacidá, onde se recueye la nuesa categoría profesional y un salariu mínimu garantizáu.
-Xornaes llaborales completes que recueyan les hores d’atención direuta col alumnáu, les hores de preparación de materiales y vocabulariu y les hores de coordinación col restu l’equipu educativu.