LA CSI DENUNCIA, ÉNTE INSPEICIÓN DE TRABAYU, A LA FUNDACIÓN DEPORTIVA MUNICIPAL DEL CONCEYU D’AVILÉS, POR POSIBLES IRREGULARIDAES NES OBRES DE LA PISCINA DE LA MADALENA

La Corriente Sindical d’Izquierda (CSI) denunció, énte la Inspeición de Trabayu, a la Fundación Deportiva Municipal del Conceyu d’Avilés, por posibles irregularidaes nes obres de la piscina municipal de La Madalena, que podríen tener repercusiones na salú llaboral de los y les trabayadores, asina como na salú de los usuarios y usuaries.

La CSI denunciare primeramente, tamién énte Inspeición de Trabayu, el mal estáu de los recubrimientos de poliuretano del falsu techu de la cubierta de la piscina y de los tubos de ventilación, que prevocaba la dispersión de polvu y partícules nel ambiente y podríen afeutar a la salú de quien pudieren alendar dichu ambiente, esto ye, trabayadores, usuarios y usuaries.

Darréu d’ello, la Inspeición de Trabayu, personada na piscina La Madalena, xunta los responsables municipales de les obres y l’equipu responsable de Prevención de Riesgos del Conceyu, dieron por solucionáu’l tema altricando qu’en diches obres procedióse a la sustitución de tolos recubrimientos de poliuretano.

Coles mesmes, la Inspeición de Trabayu y el Serviciu de Prevención de Riesgos del Conceyu d’Avilés encamentaron-y a la Fundación deportiva Municipal aplicar una vixilancia específica de la salú de los y les trabayadores que pudieren tar afectaes.

Sicasí, a día de güei y dempués de la reapertura de les instalaciones, posterior a la realización de les obres realizaes en 2015, constatóse que’l referíu recubrimientu de poliuretano sigue recubriendo tolos conductos d’aire acondicionáu que s’atopen nel sobretechu, tal como taba anantes d’entamar les obres, asina como en gran parte de les parés, ensin que se procediere a la so retirada demientres les citaes obres.

Coles mesmes, la Fundación Deportiva Municipal nun comunicó estos fechos, nin de forma verbal nin escrita, a dengún trabayador o trabayadora nin, de xuru, realizó aición dalguna p’adoptar les midíes de vixilancia y control encamentaes pola Inspeición de Trabayu y el Serviciu de Prevención de Riesgos, con cuenta de verificar les condiciones de salú y seguridá de los y les trabayadores que desempeñen les sos funciones en dichu puestu trabayu, tanto personal de la mesma Fundación como d’empreses auxiliares y usuarios y usuaries.

Por tou ello, la CSI presentó una nueva denuncia ante la Inspeición de Trabayu y desixe una investigación sobre les obres realizaes na piscina municipal de La Madalena, asina como poner en marcha, urxentemente, les midíes de control y vixilancia de la salú de los y les trabayadores de les piscines municipales avilesines.

(Semeyes de les estremaes denuncies de la CSI, sobre los recubrimientos de poliuretanu).