DENDE LA CSI ESIXE L’ABSOLUCIÓN DE LOS NUESOS COMPAÑEROS CONDERGAOS POLA SO PARTICIPACIÓN NA FUELGA XENERAL DEL 14 N DEL 2012

Otra sentencia vergonzosa contra la clase obrera.

Güei llegónos la sentencia contra dos de los compañeros de la Corriente Sindical d’Izquierda imputaos nel 14 N. Esta sentencia pon de manifiestu una vegada más la falta de derechos de la clase obrera. Un añu y 3 meses de cárcel (del añu y mediu que-yos ciscaben) pa estos compañeros por lluchar polos derechos de toes y toos. Dende la CSI queremos dicir que nos paez una vergüenza la sentencia, como toles sentencies contra la clase trabayadora. Como siempres tamos colos compañeros pa sofitalos y esiximos la so absolución.

Mientres la fuelga xeneral del 14 de noviembre de 2012, la UIP (los antidisturbios) cargaba ensin nenguna xustificación sobre un piquete informativu de la CSI y la CGT ya invadíen la Casa Sindical de Xixón, de forma absolutamente illegal, dexando a delles persones mancaes, que tuvieron que ser atendíes por unidaes móviles del SAMU.

Cuatro persones fueron deteníes y otros dos, imputaes. El so delitu nun foi otru que participar nuna fuelga xeneral, convocada por CCOO y UXT. El nuesu oxetivu nesa participación, defender los derechos más básicos consiguíos cola llucha y el sufrimientu de muchxs primero que nosotrxs y que nun vamos dexar que nos arrampuñen: trabayu, alimentos, vivienda, sanidá, educación, servicios sociales… En definitiva, lo mínimo necesariu pa llevar una vida digna.
Estes detenciones provocaron que miles de trabayadores y trabayadores arrodiaren la comisaría de Xixón mientres delles hores, hasta la so puesta en llibertá.

De resultes de too ello seis persones enfrentaronse a xuicios con pidimientos fiscales que, en xunto, superaben los 12 años de prisión. Sicasí, nin una sola de les denuncies interpuestes poles persones afrellaes pola policía, foi siquier almitida a trámite, a pesar de que los partes médicos destacaben la gravedá de les mancadures que, en dalgún casu, riquieron d’intervención quirúrxica. Dende la CSI queremos manifestar la nuesa indignación y repulsa tres los actos socedíos el día 14-N en Xixón. Pa la nuesa organización, la criminalización de les protestes y de quien participamos nelles, forma parte de la fueya de ruta d’un Gobiernu que basa la so actuación na destrucción de derechos sociales y llaborales.

Nun ye l’únicu casu de represión por una Fuelga xeneral, nin n’Asturies nin nel conxuntu del Estáu español. Son centenares los y les trabayaores condergaes o encarcelaes por participar nes distintes convocatories de fuelga realizaes mientres estos años.

Nel conxuntu d’Asturies, tamos falando de decenes y decenes de persones encausaes. Esta realidá pon en xuegu non solamente los derechos básicos que se defenden, sinón el mesmu derechu a la protesta, el derechu a la fuelga y el derechu a participar en piquetes informativos.
Por tou ello dende la Corriente sindical d’Izquierda volvemos repitir el nuesu sofitu a estos dos compañeros condergaos del 14 N y a toles persones imputaes por lluchar polos derechos de la clase obrera. Y de xacíu vamos faer tolo necesario pa esixir la so absolución.

Quiérennos calladxs, quiérennos con mieu, pero nun lu van a consiguir.

¡14 N ABSOLUCIÓN! ¡ABSOLUCIÓN PA LA XENTE QUE LLUCHA!

¡TÓQUENNOS A UNX, TÓQUENNOS A TODXS!