Comunicáu de lxs trabayaores del SERIDA (Serviciu Rexonal d’Investigación y Desenvolvimientu Agroalimentariu)

CSI-SERIDA (Serviciu Rexonal d’Investigación y Desenvolvimientu Agroalimentario)

Dende la de la Corriente Sindical d’Izquierda nel SERIDA queremos denunciar la pésima xestión de personal y l’incumplimientu sistemáticu del Conveniu Coleutivu, per parte los responsables de la so xestión y direición.
El SERIDA como organismu públicu créase tres un conflictu llaboral surdíu por un intentu de privatizar el serviciu en 1999, dempués de 342 díes d’enzarru y llucha na cai que rematen col fracasu de la so privatización.
Sicasí, 17 años dempués y gracies a la nefasta xestión de dellos direutores, ente ellos Koldo Osoro, investigáu por presuntos delitos, tenemos que tornar a reivindicar la xestión pública del SERIDA, tantu na prestación del serviciu como na xestión de personal, una y bones esti Serviciu Rexonal foi dexenerando y convirtiéndose nun cortixu del PSOE.
Y tou ello col respaldu de la SRa. Conseyera Mª Jesús Álvarez, de la mesma Presidenta del Conseyu Rector del SERIDA. Dende estos cargos fai oyíos sordos a les continues denuncies presentaes pola CSI y a les que non se digna retrucar.
El clientelismo llaboral que denunciamos consiste en:
1-La constante contratación d’asistencies téuniques pa nun cubrir vacantes d’estructura yá que resulta más baratu, por tratase d’empléu precariu y, al empar, déxa-yos escoyer empleaos a la carta ensin sometelos a la Llei d’Accesu a la Función Pública, esto ye, a criterios de capacidá, igualdá y merito.
2-L’usu constante de “comisiones de serviciu” pa cubrir puestos de xefatures. Por esti sistema solo pueden ocupase dichos puestos por un tiempu máximu de dos años, pero, davezu, les xefatures tórnense, por arte de maxa, n’indefiníes, torgando que s’ocupen en propiedá por concursu públicu.
3-El cese del Xefe Personal, por aciu d’una “atribución provisional de funciones”, nun momentu críticu, pola llegada del nuevu Director Xerente, quedando’l SERIDA ensin Xefe Personal demientres 3 meses, pero cobrando del SERIDA demientres esti tiempu yá que exerz les sos funciones n’otra Conseyería (malo d’entender esti término técnicu).
4-La falta predisposición pa iguar los conflictos llaborales como’l qu’esiste nel Centru de La Mata, en Grau, que surde por un resolvimientu na que s’encamienten funciones de “superior categoría” a un operario, ensin qu’esista causa previa que la xustifique yá que nel centru hai 6 oficiales y un operariu y los oficiales realicen funciones d’operariu diariamente. Poro, nun tien sen esta encamienta salvu’l premiar al acólito de vez.
Tou esto ta entamáu pol Coordinador del centru, Valentín Prieto, qu’ocupa dichu puestu en “comisión de serviciu”
La CSI quedó en solitariu na defensa de los derechos de los y les trabayadores, yá que’l restu’l Comité d’Empresa pescancia qu’esta triba xestión de personal a la carta ye llegal.
Per otra parte, el nuevu Direutor Xerente, Ramón Juste, que venía a “romper tensiones” según declaró en see parllamentaria, delegó’l resolvimientu’l conflictu nel Secretariu Xeneral Téunicu de la Conseyería, qu’aconceyó col Comité d’Empresa nuna sola ocasión dende xunetu de 2015, ¿ú la predisposición a romper tensiones?.
La CSI propón una negociación amplia pa tolos operarios y operaries del SERIDA y non solo pa ú d’ellos.
Dende la CSI nel SERIDA entendemos qu’estos son motivos abondo pa entamar movilizaciones desixendo qu’esti cúmulu despropósitos, xestión deficiente, clientelar y partidista, terminen yá pa nun llevar al SERIDA a un futuru inciertu onde les consecuencies tornen a pagales los y les trabayadores, que nun tienen nenguna función na xestión d’esti Serviciu Rexonal, como yá asocediera nel desaniciáu CIATA.