Concentración 8 de Marzu n’Avilés: Feminismu combativu p’alcanzar la libertá

CONVOCA: MUYERES AVILÉS.

DÍA 8 DE MARZU, DÍA CLAVE NA LLUCHA DE LES MUYERES

La sociedá capitalista y patriarcal del S. XXI tien normalizao y asimilao’l machismu nel so raigañu. ¿Pero qué consecuencies tien el machismu sobre les muyeres? El machismu establez una xerarquía y un xuegu de poderes nos que les muyeres siempres tamos n’inferioridá pol meru fechu de selo y que provoca: VIOLENCIES MACHISTES.

Esti conceptu va dende los micromachismos diarios que toles muyeres sufrimos en nuesos pellellos como por exemplu: roles de xéneru, infravaloración de la muyer, imposición d’un modelu d’imaxe irreal de la muyer y cánones de belleza dañinos, distinciones a la hora d’educar, asunción de los roles de cuidaos, insultos y piropos como daqué normalizáu…

Pero nun queda ehí, sinon que va muncho más allá. Recrea la cultura de la violación, xustificando les agresiones físiques, sexuales y psicolóxiques, el control y el sentimiento de posesión de la pareya, el conceptu d’amor romanticu, desigualdaes salariales, escases oportunidaes nel mundu llaboral, acosu, retayos nos drechos básicos, conquista del cuerpu de la muyer, concepción de la maternidá como dalgo impuestu… Que, amás, sustenta un terrorismu estructural: los FEMINICIDIOS.

Tanto los medios de comunicación, como la educación y la cultura, manipulen y maquillen el terrorismu machista como dalgo que forma parte de les nueses vides y tenemos que vivir con esi riesgu. Fomenta la cultura del mieu, de la inseguridá nes muyeres y la superioridá irreal de los homes, xustificando asesinatos tanto de les propies muyeres como de la infancia.

Pero les muyeres nun somos eso que nos quier imponer el capital, somos otra cosa. Somos la metá de la población, l’exe fundamental del sistema de trabayu, tanto domesticu (que nun ta reconocíu como tal) como del trabayu más normativu. Somos la fonte de la vida y les que llevamos el pesu de la conciliación familiar y llaboral. Somos muyeres de clase obrera, antifascistes, antirracistes y anticapitalistes. Muyeres que lluchamos escontra vientu y marea por alzar la nuesa voz, por ser quienes queremos ser. Somos lluchaores, capaces de defendenos y xuníes muncho más fuertes.

Poro, cada día lluchamos por algamar el drechu a decidir sobre los nuesos cuerpos y la nuesa vida. Por una llexislación que emancipe a les muyeres énte’l riesgu de maltratu y condergue a los agresores y asesinos ensin impunidá. Por unos drechos sociales que nos garanticen una vida digna. Por una educación feminista. Por unos drechos llaborales que nun nos subordinen a la precariedá. Pol desaniciu de los estereotipos machistes. Por una sexualidá llibre de llimitaciones y d’estereotipos de families. Por lliberanos de la opresión eclesiástica y por eliminar la ideoloxía machista de los medios de comunicación y de la educación.

Súmate a la concentración del 8 Marzu na plaza del Parche d’Avilés a les 18:00. Xúnite y glaya pola to vida. Solidarízate y llucha, por toles muyeres asesinaes a causa del terrorismu machista. Pelea pola igualdá d’oportunidaes y polos drechos llaborales. Lliberémosnos de la opresión y del mieu.

¡FEMINISMU COMBATIVU P’ALGAMAR LA LLIBERTÁ. EL 8 DE MARZU Y TOLOS DÍES SAL A LA CAI Y LLUCHA POR UNA ASTURIES FEMINISTA, POLA VIDA QUE QUEREMOS HEREDAR, POR TÍ, POR TOES NOSOTRES.

(Pa cualisquier otra información: Nuria, tfnu. 662 53 07 60)