II Xornada Feminista: La llucha feminista d’ayer y de güei

El prósimu 5 de marzu, con motivu de la cellebración del 8 marzu, Día de la muyer, facemos la II Xornada feminista de Muyeres en llucha de la CSI nel Centru Social La Llume en Xixón: La llucha feminista d’ayer y de güei.

A les 12:00 h.

– Inauguración de la esposición de Cartelos feministes n’Asturies

De 12:00 a 13:30 h:
– Taller d’autodefensa pa muyeres (trayer ropa de cai).
La compañera Elena, que da’l taller, quier que seya lo más realista y prácticu posible por eso aconseya qu’anque se vaya con ropa cómoda seya la ropa cola que normalmente vestimos.

De 14:00 h a 16:00 h:
– Xinta popular de traxe

De 16:00 h a 18:00 h:
– Charra-alderique: La llucha feminista d’ayer y de güei: ¿vieyos y nuevos conflictos?
Ponentes:
. Gabriela N, investigadora: nos faerá un recorriu pola esposición y los cartelos feministes d’Asturies. Estos cartelos mos los presta del so archivu héstoricu la Fundación Juan Muñiz Zapico.
. Nerea: historiadora ya investigadora de feminismu contemporáneu: el reccorriu de Nerea nun ta sobre les parés como los cartelos pero tamién recorrió y recuerre les cais. Más qu’una charra al usu Nerea quier damos dalgunos pegoyos onde apoyamos pa debatir.

Col títulu La llucha feminista d’ayer y de güei queremos facer un recorríu polos problemes, desigualdaes y discriminaciones que les muyeres (toes) venimos enfrentando fae cuanto ya. Por eso’l títulu de la xornada y de la charra-alderique de la tarde La llucha feminista d’ayer y de güei: ¿vieyos y nuevos conflictos?

Tamos viendo que la hestoria repitese una y otra vez, qu’anque se consiguieron coses falta tovía un gran trechu nel camín de la igualdá. Por eso mos preguntamos ¿podemos falar de vieyos y nuevos conflictos na llucha feminista o son los mesmo los d’anguaño que los d’antañu? ¿En qué contextu mos alcontramos? ¿Qué significa na llucha feminista de güei que mos vendan qu’hai democracia ya igualdá? ¿Qué y cómo siguir cola llucha?,….Son munches les preguntes y los retos pero de xuru qu’ente toes aldericando y compartiendo esperiencies y esmoliciones somos a dar un pasin más nel camín de la igualda y la xusticia. Y como l’añu pasáu foi tan guapa la xornada esti añu repetimos pa siguir deprendiendo en comuña.

Vemonos el díi 5 na Llume.

Participa y ayudamos a difundir.