PORTADA DE LA REVISTA “L’ALMORRANA”, DE LA SEICIÓN SINDICAL DE LA CSI NEL POZU CARRIO

CSI-POZU CARRIO (HUNOSA)

LOS VOCALES DE SEGURIDÁ TIENEN DE DIMITIR

Con fecha de 8-01-2016 y de 12-01-2016 la Seición Sindical de C.S.I. en Carrio apurrió a dos vocales de seguridá, ún de cada sindicatu y al delegáu mineru de seguridá informes sobre delles cuestiones. Ún d’ellos trataba sobre los problemes de seguridá que pueden dase pola ausencia d’embarcador- señalista al relevu de la nueche y festivos- y otru sobre l’insuficiente galibo na galería de 9ª planta. Los informes son detallaos y cenciellos d’entender y nun precisen pa ser presentaos nel comité de seguridá más que comprobar la so veracidá.
El comité de seguridá ta formáu ente otros por cuatro vocales de seguridá que son trabayadores del centru. Estos vocales son propuestos pol Comité, ye dicir polos representantes de el trabayadores. Nel casu de Carrio dos vocales son del SOMA y dos de CCOO.
Con fecha de 29-01-2016 hubo xunta del comité de seguridá, como tolos meses y magar nun tener accesu a les actes d’estes xuntes cónstanos que los vocales de seguridá omitieron presentar o aldericar sobre los informes mentaos más arriba.
Dende la Seición Sindical de C.S.I. venimos enfeando dende la nuesa nacencia la falta d’implicación de los vocales de seguridá nel so trabayu, la dexadez como vocales más allá de (como dalgún d’ellos mesmos diz) zucar los díes que xenera’l pertenecer al comité de seguridá. Por escritu y n’asamblees aportunamos en dicir que’l centru de trabayu tien tolos sistemes en materia de seguridá pa prevenir accidentes (delegáu mineru de seguridá, vocales de seguridá, comité de seguridá, departamentu de seguridá) pero o nun s’usen o s’usen mal. Y ye especialmente sangrín que, dempués de qu’asoceda un accidente nos diga’l representante de vez n’asamblea que tenemos d’implicanos toos na seguridá cuando los sos vocales, los qu’él mesmu propunxo abstiénense de presentar nel comité de seguridá informes fechos y detallaos que nun dan más trabayu qu’a cencielles presentalos nel comité.
Tenemos de recordar que’l ser vocal de seguridá apareya una riestra responsabilidaes. Nun se trata equí d’axustar dos o tres euros, sinón de la integridá física de los trabayadores, non de los trabayadores d’otru continente que por alloñanza podría paecer menos importante, sinón de la integridá física y seguridá de los sos propios compañeros, colos que trabayen a diariu. Tenemos que recordar tamién que ser vocal de seguridá ye un fechu voluntariu y quien lo sía y nun tea a gustu puede dise cuando quiera, de xuru qu’apaez daquién abondo preparáu pa da-y el relevu.
Nun tenemos d’escaecer que los sindicatos SOMA y CCOO tienen nesto un gran porcentaxe de responsabilidá, yá que conocen meyor que’l restu los trabayadores cómo (non) funciona’l comité de seguridá y qu’amás son ellos los que proponen a les persones que la formen, barruntamos que non pa ser meros espectadores serviles de la empresa.
Bonalmente creemos que nun se puede tener la más mínima dignidá y siguir siendo vocal del comité de seguridá cuando te pases pol arcu’l trunfu la integridá física de los tos propios compañeros, nesti sen tienen de ser tamién estos, los compañeros, el conxuntu la plantía, los que sían críticos con esta triba actitúes. Porque LA SEGURIDÁ SI YE COSA DE TOOS.
Asina los fechos, dende la Seición Sindical de C.S.I. del pozu Carrio tenemos el deber de pidir públicamente la dimisión de los vocales de seguridá del pozu Carrio por dexadez de funciones. O esto o que dean desplicación concreta al conxuntu los trabayadores de les causes poles que nun presentaron los informes nel comité.