EL XULGÁU DE LO SOCIAL 1 D’UVIÉU DECLARA LA NULIDÁ’L DESPIDU D’UNA EXTRABAYADORA DEL PLAN D’EMPLÉU D’UVIÉU

CSI-PLANES D’EMPLÉU

El xueves pasáu, 10 de diciembre, la xueza del Xulgáu de lo Social 1 d’Uviéu emitió la primer sentencia referente a demandes que tán presentando les y los extrabayadores del Plan Llocal d’Empléu d’Uviéu 2014-2015, y que sumen yá más de 90 casos.

Nesta primer sentencia la xueza, como yá asocediere fae unos meses en múltiples sentencies de los Xulgaos de lo Social de Xixón y del Tribunal Superior de Xusticia d’Asturies que resultaron toes elles favorables a les y los trabayadores del Plan Inserta de Xixón, considera fraudulentu’l contratu por obra o serviciu aplicáu a la extrabayadora, por nun ceñise’l contratu a los requisitos formales especificaos por Llei, dando asina la razón a la demandante, defendida polos servicios xurídicos de la Corriente Sindical d’Izquierda, que alegaba que, como nel restu de casos de Planes d’Empléu, la so contratación tuvo como fin facer llabores propies y ordinaries de l’alministración llocal, nesti casu l’Ayuntamientu d’Uviéu. Asinamesmu, la xuez conderga al Ayuntamientu a abonar les diferencias salariales devengaes nel añu de duración que tuvo’l contratu, pues la trabayadora, que cobraba sigún el Conveniu Colectivu de Planes d’Empléu del Principáu d’Asturies, tenía que cobrar sigún la tabla de retribuciones del personal propiu del Ayuntamientu.

Finalmente, y dao que la trabayadora taba embarazada nel momentu’l despidu, la xueza declara nulu’l despidu y obliga al Ayuntamientu a la realmisión de la demandante y al pagu tamién de los salarios de tramitación devengaos dende la fecha’l despidu, el pasáu 30 de setiembre.

Dende la Corriente Sindical d’Izquierda valoramos mui positivamente esti nueu fallu xudicial, que se suma a los 38 despidos improcedentes y 17, pel momentu, xuicios ganaos por diferencias salariales en Planes d’Empléu de Xixón esti mesmu añu. A la espera de lo que asoceda col restu de casos n’Uviéu, y tamién nes demandes presentaes pola CSI contra los Ayuntamientos de Xixón, Uviéu, Siero, Villaviciosa, Cabranes, Grao, Salas, Mieres y Llangréu, reiteramos la denuncia pública contra les corporaciones llocales que usen al personal de Planes d’Empléu como mano d’obra barato y con derechos llaborales recortaos, fomentando la precariedá y la miseria na contratación. Asinamesmu, y tamién una vegada más, denunciamos el silenciu cómpliz de UGT y CCOO, firmantes de los Convenios Colectivos de los Planes d’Empléu.

Pa finar, y refiriéndonos en concretu al Ayuntamientu d’Uviéu, encamentamos al tripartitu llamáu “del cambiu y de progresu”, a que, conocida esta primer sentencia favorable, actúe en consecuencia, afitando a la mayor premura posible medíes a favor de los y les trabayadores del Plan d’Empléu que nel so día rexistraron reclamación previa, y que agora tán a la espera de xuiciu. La defensa de lo público, la defensa de les y los trabayadores y la llucha contra los recortes, coles que tanto se enllenen la boca estos díes en campaña, entamen pola propia casa. Agora tienen una oportunidá inmeyorable pa demostrar a la clase trabajadora que los sos eslóganes ellectorales pueden ratificase con fechos, y nun dexalo en pallabres vacíes.