Asturies en pie llama a participar nos actos escontra’l fascismu del mes de payares

ASTURIES EN PIE FAI UN LLAMAMIENTU AL PUEBLU ASTURIANU A PARTICIPAR NOS ACTOS ESCONTRA’L FASCISMU, ENTAMAOS POR XIXÓN ANTIFACISTA Y EL CENTRU SOCIAL LA LLUME NEL MES DE PAYARES

VIENRES 20 PAYARES. 18:00 h. UFRIENDA FLORAL A LOS Y LES LLUCHADORES ANTIFASCISTES. FUESA COMÚN D’EL SUCU. CAMPUSANTU CIARES. XIXÓN. ASTURIES.

SÁBADU 21 DE PAYARES. PASUCAIS ESCONTRA’L FASCISMU. 17:00 h. LA GOTA LLECHE. PLAZA L’HUMEDAL. XIXÓN. ASTURIES.

SÁBADU 21 DE PAYARES. CONCIERTU. 20:00 h. CENTRU SOCIAL LA LLUME. CAI NAVA 1. XIXÓN. ASTURIES.

ENTAMEN: XIXÓN ANTIFACISTA, CENTRU SOCIAL LA LLUME

SOFITA: ASTURIES EN PIE (Formen parte de ¡Asturies en Pie!: CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU, CENTRU SOCIAL LA LLUME, ESPACIU LA LLEGRA, DARRÉU, MIERES EN LLUCHA).

COMUNICÁU D’ASTURIES EN PIE: ¿HASTA CUÁNDO VAMOS SIGUIR PERMITIENDO LES AGRESIONES NAZIS?

Demientres les pasaes selmanes tuvieron llugar n’Asturies delles agresiones fascistes que, en llugares como Xixón o la Cuenca’l Nalón, tán produciéndose con más frecuencia de lo habitual.

Grupos nazis, protexíos pola impunidá na que se mueven, salen a la cai col únicu oxetivu d’afrellar a cualisquier persona que-yos paeza comeniente.

Les sos conexones coles ocupaciones de los “llares sociales” fascistes en Madrid tán tan clares como la esistencia de llocales y ximnasios, nos que se preparen les agresiones que, dempués, tienen llugar con impunidá dafechu.

Mentantu, la izquierda institucional fai lo único que paez tar dimpuesta a faer: comunicaos enllenos de robles de conceyales y diputaos, más ocupaos coles sos eleiciones y coles sos instituciones que con esti tipu d’agresiones violentes que tán teniendo llugar nes cais y llugares públicos.

Por estes razones y con tou’l nuesu respetu, dende Asturies en Pie queremos faer públiques delles esixencies:

1-A les organizaciones sindicales: una respuesta na cai. Cola firmeza que s’espera énte fechos tan graves como los que tán asocediendo.

2-A los delegaos y delegaes sindicales y a les organizaciones obreres más conscientes: una rempuesta cola contundencia que’l fascismu merez. Nun podemos esperar a ser nós les víctimes de les agresiones fascistes; tenemos de reaicionar agora.

3-A los y les conceyales, diputaos y diputaes de la izquierda institucional: tenéis nes vueses manes el poder político. Utilizái los vuesos resortes, descolgai los teléfonos que sían necesarios y dái un puñetazu na mesa. Tenéis la obligación de faelo y nestes eleiciones tenéis de dexalo claro, porque los votos que recibís son pa daqué más que pa roblar comunicaos enllenos de grandes declaraciones, pero vacíos de fechos. Hai que poner fin a les agresiones fascistes porque, de nun ser asina, la vuesa inaición tórnase en complicidá.

4-Al conxuntu los y les trabayadores: si miramos la hestoria, el capitalismu, en dómina de cris, siempres utilizó al fascismu pa combatir les reivindicaciones obreres. La nuesa defensa sofítase na nuesa propia autoorganización y ye imprescindible la nuesa participación decidida nes movilizaciones escontra’l fascismu y les agresiones nazis.

5-A quien enllenáis los conciertos antifascistes de conseñes y banderes: faéi lo mesmo nes cais, nos conceyos, nes ciudaes y nos barrios. Buscái la vuesa propia autoorganización y nun esperéis a tener una amenaza o una agresión na cai o en cualisquier llugar públicu.

¡PAREMOS AL FASCISMU AGORA!