Manifestación pola realmisión de toles persones despedides pola ONCE nel Centru Especial d’Empleu APTA. Pola continuidá de tolos puestos de trabayu

ENTAMA: TRABAYADORES D’APTA

La ONCE, nel añu 2011, fíxose cargu de la xestión y financiamientu del CENTRU ESPECIAL D’EMPLÉU APTA del Grupu FUNDOSA, perteneciente a la Corporación Empresarial ONCE.

El compromisu yera’l d’apurrir carga trabayu y reorganizar la Sociedá, dando como resultáu lo que vien darréu:

-Añu 2012: despide a 103 persones y apodérase de la Nave de Roces.

-Nel Exp. de 2012 apáñase la xubilación del presidente del Comité, Miguel Cano, de CCOO.

-Añu 2013: la Organización Nacional de Ciegos Españoles (ONCE) foi galardonada col Premiu Príncipe d’Asturies de la Concordia pol so llabor pa “ameyorar la dignidá y la calidá de vida de les persones con discapacidá”, pa ello nel añu 2014 non solo nun apurre alternativa dalguna pa los 103 despidos de 2012, sinón que despide a 10 persones que nun tienen discapacidá, pero desenvuelven la xera d’orientación. Roblen un espediente pa la inmensa mayoría de la plantía demientres un periodu de 2 años o hasta qu’escosen la totalidá de les prestaciones contributives de desempléu, quedando nuna situación bien delicada al rematar l’espediente, porque esti nun recueye una rotación seria ente la plantía (el comité nun ta afectáu) y apliquen una autentica discriminación sindical.

-Nel Exp. de 2014 apáñase la xubilación de Manuel Núñez, secretariu’l comité pola UXT.

-Nel mesmu añu 2014: el 28 mayu la ONCE apodérase de les instalaciones del Piles, por valor de 3.385239 € y formaliza un contratu d’arrendamientu con APTA de les citaes instalaciones. APTA pasa a ser arrendatariu de les sos instalaciones por valor añu 2014, de 133.000 € y 2015 de 186.989€.

Ye de resaltar que p’apoderase de tol padrimoniu d’APTA, dexó qu’antiguos direutivos que nel 2012 causaron baxa na empresa y que cobraron como personal d’alta direición, colaren con información abonda, cartera de veceros etc, pa montar una empresa que ta faciendo la competencia deslleal a APTA, faciendo trabayos qu’anantes se realizaben n’APTA, pa terminar de quebrala.

OXETIVOS DE LA ONCE-ILUNIÓN: la construición d’un posible hotel de la cadena ILUNION-Hotels. Entrugamonos: ¿ye esta’l llabor social pa “ameyorar la dignidá y la calidá de vida de les persones con discapacidá?.

Tenemos de dicir que “Nun lo vamos a consentir”. Pa ello tamos equí, pa torgalo.

El Gobiernu asturianu y el Conceyu de Xixón tienen d’apurrir igües.

Por ello, teniendo en cuenta qu’atopamonos énte un Centru Especial d’Empléu imprescindible pa Xixón y Asturies, que da ocupación a persones con estremaos graos de discapacidá, nun se-y puede tratar en términos economicistas, rique la solidaridá de tolos asturianos y asturianes, col Gobiernu asturianu y el Conceyu Xixón a la tiesta, pa realizar ensin perda tiempu la xestión que vien darréu:

-Realizar una Auditoria pa comprebar si la xestión ye l’afayadiza o se tien de modificar.

-Collaborar n’algamar la carga trabayu necesaria pa caltener ocupaes a la totalidá de les persones. Por rentabilidá social, resulta mas económicu ensin llugar a duldes, caltener a estes persones ocupaes, en llugar de faciendo cola nel centru de Salú Mental.

-Por solidaridá humana, si ye necesario, apúrrase la subvención correspondiente, con control rigorosu, que dea estabilidá al Centru Especial d’Empléu.

¡Pola realmisión tolos despidíos y despidíes n’APTA!. ¡Pola continuidá de tolos puestos de trabayu!. ! Non más despidos!. ¡Non a la Especulación!