Comunicáu de les y los trabayaores intérpretes de Llingua de signos n’Asturies

¡¡¡DEXÁI DE PUYANOS!!!. ¡¡¡DIGNIDÁ LLABORAL YÁ!!!!

Les y los intérpretes de llingua de signos que desendolcamos el nuesu llabor nes aules asturianes (primaria, secundaria, FP, educación especial…) venimos sufriendo retayos continuos y drásticos de los nuesos salarios y derechos desque nel añu 2011 la Conseyería d’Educación y Cultura d’Asturies decidiere privatizar el serviciu d’interpretación empobináu al alumnáu sordo.

El serviciu alxudícase principalmente a la empresa que presente un presupuestu más baxu, poco importa que nun se respeten nin los más mínimos derechos llaborales, una y bones la Conseyería desentiéndese dafechu al respeutive y nun fae casu dalgún a les nueses demandes.

La privatización del serviciu y dexadez per parte la Conseyería, sumiónos nuna situación d’indefensión total y déxanos nes manes de los intereses económicos d’empreses como, ADECCO-ATLES, pa la qu’anguaño trabayamos. Empreses que desconocen la realidá de los centros educativos, les necesidaes del alumnáu y lo más elemental alrodiu los nuesos puestos de trabayu.

El contautu con ADECCO-ATLES amenórgase al teléfonu y el corréu eleutrónicu o alcuentros puntuales pa la firma contratos, esto ye, embólsense cantidaes inxentes de dineru por malapenes xestionar baxes y altes de la Seguridá Social, nómines y finiquitos, demientres que les profesionales que caltenemos el serviciu venimos aguantando cada vez más presiones y retayos:

-Cambeos constantes de convenios coleutivos ensin alxudicanos nunca l’afayadizu. aplicósenos el Conveniu d’Oficines y Despachos del Principáu d’Asturies, Conveniu d’Oficines y Despachos de la Comunidá de Madrid y, a lo cabero, el Conveniu “Alcuerdo d’Empresa ATLES”, conveniu pantasma, yá que, según reconoz la mesma empresa, aplícasenos l’Estatutu de los Trabayadores.

-Modificósenos en múltiples ocasiones la categoría llaboral. Anguañu figuramos como “AUXILIARES ALMINISTRATIVOS”, que nada tien que ver coles nueses funciones y puestos.

-Rebaxes drástiques de los nuesos salarios y de les xornaes llaborales: anguaño cobramos a 5 € la hora y casi denguna tamos a xornada escolar completa. Por poner un exemplu, nel mes d’ochobre malpenes dalguna trabayadora llegó a cobrar 500 €.

-Firma de solicitú de vacaciones con antelación o al empar que la firma’l contratu: díctasenos qué díes tenemos de “solicitar”

-En xunu desaníciase’l contratu y volvemos al paru cada branu ensin saber si vamos tornar a trabayar.

-Nun atropamos antigüedá. Partimos de cero cada mes de setiembre, anque lleves más de 10 años trabayando nel serviciu.

-Nun cobramos pel branu. Si’l to alumnu/a dase de baxa, cola pa otra comunidá autónoma, etc, desaníciente’ll contratu y solo vas tornar a trabayar si, con suerte, deciden recolocate n’otru centru.

-Nos Pliegos de la Conseyería, p’alxudicar el serviciu al 2meyor” postor, nun s’establez la subrogación del personal.

Amás tenemos de señalar que l’actual xestión del serviciu afeuta direutamente al alumnáu. Cada añu amenorga’l presupuestu y retáyase en recursos humanos, afeutando gravemente al alumnáu en toles etapes educatives. TENER INTÉRPRETE NUN YE UN PRIVILEXU, YE UN DERECHU reconocíu na LLEI 27/2007, de 23 d’ochobre, pola que se reconocen les llingües de signos españoles y regúlense los medios de sofitu a la comunicación oral de les persones sordes, con discapacidá auditiva y sordociegues.

La Conseyería d’Educación y Cultura, magar que reconoz la nuesa situación, lleva años llavándose les manos, con impunidá dafechu, al igual que les empreses a les que nos puyen como oxetos.

Por tou ello desiximos lo que vien darréu:

-Que, exerciendo’l nuesu oficiu en centros educativos asturianos, incorpóresenos como personal llaboral de la Conseyería d’Educación y Cultura, por aciu la creación d’una bolsa d’empléu como yá se fixera col personal auxiliar téunicu educativu y fisioterapeutes n’otres comunidaes, poniendo fin a la cesión illegal que sufrimos dende la privatización del serviciu.

-Que se nos reconoza la nuesa antigüedá con calter retroactivu