Los mineros de Zarréu nun van entrar en prisión. L’audiencia provincial almite los argumentos de la defensa y amenorga la conderga a un añu de prisión

La Sala Segunda Sección de l’Audiencia Provincial d’Asturies dictó sentencia sobre’l casu de los 5 mineros de Zarréu, almitiendo los argumentos de la defensa y amenorgando la conderga a un añu de prisión y a delles multes que, nel casu’l nuesu compañeru de la CSI, Toño, xuben a 5.280 €.

Escontra esta sentencia non cabo recursu ordinariu dalgún y solamente podría interponese un Recursu d’Amparo énte’l Tribunal Constitucional.

Dende Asturies en Pie y dende la CSI vamos enanchar esta información dempués d’analizar la sentencia.

Anunciámosvos que, cuando nos sía posible, Asturies en Pie va entamar un actu públicu, nel que toes y toos vamos poder cellebralo y siguir xuniendo fuerces pa continuar la llucha de la clas obrera asturiana.

Enagora, dexámosvos coles primeres pallabres del nuesu compañeru Toño:

“Anantes de nada, quiero dar les gracies a toles persones que nos sofitaron. A quien nos sofitastis, inclusive ensin conocenos, gracies pola vuesa solidaridá. Y a quien tuvistis tolos díes con nós, faciendo lo posible y lo imposible y arriesgándolo tou pola nuesa llibertá, siéntolo, pero nun me salen les pallabres.

Esto ye una batalla más de la clas obrera. Algamamos la llibertá de los 5 mineros de Zarréu. Agora, tenemos de siguir engarrando pa que nin una sola persona más entre en prisión por defender los sos derechos. Como dicía ún de los cartelos que sacamos: Cola llucha obrera hai futuru. Gracies a toes y a toos”.

https://www.facebook.com/corrientesindicaldizquierda.asturies/