La CSI alvierte públicamente d’una concentración que podría ser illegal, ante l’Hotel Reconquista d’Uviéu convocada pola Plataforma ciudadana de sofitu a los Premios Princesa

La Corriente Sindical d’Izquierda quier alvertir públicamente a les autoridaes competentes, de la realización d’una concentración que podría ser illegal, convocada pola Plataforma de Sofitu a los Premios Princesa, pa les 17:30 h., del próximu vienres 23 d’ochobre, énte l’Hotel Reconquista d’Uviéu.

Esta Plataforma de Sofitu a los Premios Princesa, non solo convocó públicamente esta concentración, sinón que declaró en tolos medios de comunicación que “nun tenía pensáu pidir autorización pa esti actu a la Delegación del Gobiernu”.

Dende la CSI queremos recordar a les autoridaes competentes qu’esti tipu de fechos podríen constituyir una infraición grave de la Llei de Seguridá Ciudadana (art. 36), que puede llegar a ser sancionada con 30.000 euros de multa.

Coles mesmes, dende la CSI recordamos a les autoridaes competentes que, cola recién reforma del Códigu Penal, “la distribución o espardimientu públicu, al traviés de cualisquier mediu, mensaxes o conseñes qu’afalen a la comisión de dalgún de los delitos d’alteración del orde públicu o que sirvan pa reforzar la decisión de llevalos a cabu, va ser castigáu con una pena de multa de trés a doce meses o prisión de tres meses y un añu”.

Entá entendiendo l’estáu de frayamientu dafechu de los nervios que carez la Plataforma de Sofitu a los Premios Princesa, la CSI considera que naide, y menos entá quien dicen defender los altos intereses de la Casa Real, tendría de tar percima la Llei nin, muncho menos, afalar al conxuntu la ciudadanía a cometer actos que podríen resultar dafechu illegales.

Dende la CSI esperamos que la mesma Casa Real tome cartes nel asuntu y, como cimeros dirixentes del Estáu, impidan la realización d’actos que podríen atentar escontra la llexislación vixente.