El grupu d’empreses Fahime presenta un ERE d’extinción pa la totalidá de la plantilla (92 trabayaores) y el zarru de toles sos empreses

El grupu empresarial FAHIME, asitiáu nel Polígonu de Tabaza (Carreño), presentó un ERE d’estinción pa tola so plantía, qu’afeuta a la totalidá de los 92 trabayadores y va significar el zarru de toles empreses del grupu: Mecafran, Caldefran, Serton Servicios ya Industrial Marande.

Esti ERE atópase, nesti intre, na fase consultes ente la Direición empresarial y el Comité d’Empresa (UXT, CCOO y CSI), periodu que va durar hasta’l viniente 5 payares.

Nes xuntes calteníes hasta’l momentu, la Direición de la empresa negóse, costantemente, a plantegar otru escenariu que nun sía’l pieslle empresarial y la estinción de la totalidá los contratos, sofitándose nunes cuentes que, pa la CSI, nun tán tan clares como pretende la empresa y que precisen d’un analís a fondu.

Na Corriente Sindical d’Izquierda (CSI) consideramos qu’esti ERE ta plantegándose dempués d’una pésima xestión empresarial, con unes cuentes bien duldoses, un entramáu d’ERTEs y EREs que namás tienen la intención de desfacese de la plantía de la manera menos costosa y l’amenaza constante a los trabayadores de nun poder cobrar les indemnizaciones correspondientes, en casu de nun roblar un alcuerdu que refrende’l ERE d’estinción.

Dende la CSI queremos denunciar públicamente estes maniobres empresariales y anunciamos que, sía cuala sía la resultancia d’esta ronda negociaciones, el nuesu sindicatu va siguir engarrando pola continuidá de la empresa y nun va roblar el despidu de dengún trabayador.