Concentración de sofitu a les trabayadores esplotades nel Centru Xerontolóxicu Xovellanos ¡Basta ya d’acosu a les trabayadores!

CONVOCAN: CSI Y MUYERES EN LLUCHA

¡Tóquennos a una, tóquennos a toes!

La Corriente Sindical d’Izquierda y el coleutivu Muyeres en Llucha convoquen una concentración de sofitu a una trabayadora del centru xerontolóxicu Xovellanos, sancionada por un inesistente abandonu del puestu trabayu, nel actu conciliación que va cellebrase nel UMAC de Xixón (cai Llibertá 30), el viniente martes 20 d’ochobre, a les 10:15 h.

Reproducimos darréu los altriques de la trabayadora al espediente sancionador:

“L’acusación que se me fai d’abandonu de puestu trabayu, amás de ser bien grave, ye dafechu incierta.

Siendo conocedora la Direición del centru de que’l pasáu 12 d’agostu, nel turnu de 15 a 22 hores había una trabayadora menos y otra incorporábase a la empresa esi mesmu día, ordena a les trabayadores xubir a dos residentes por auxiliar.

La supervisora de turnu, faciendo casu omisu de les ordes de la Direición del centru, da orde d’enllenar los ascensores de residentes, escaeciendo les direutrices de la Direición y los protocolos d’actuación, amás de poner en serios apiertos a les trabayadores pa realizar les sos funciones. De fechu, un residente escapóse, teniendo que salir nel so auxiliu una compañera, dao que yo atopábame asistiendo a dos residentes, una d’elles con altu riesgu de cayía, tal que sabe la Direición del centru.

De la mesma, la única conversación que caltuve cola supervisora, foi p’alverti-y de lo que taba asocediendo, yá que nun coincidiera con ella en tola tarde”.

Esto ye, el fechu d’allegar a la supervisora p’alverti-y de la grave situación que se produxera, ye utilizáu como una escusa pa sancionar a la trabayadora por un inesistente abandonu de puestu trabayu.

Da la ¿casualidá? de qu’esta trabayadora ye la Delegada Sindical de la Corriente Sindical d’Izquierda nel centru xerontolóxicu Xovellanos. Amás, ye una de les trabayadores que promovieron les eleiciones sindicales nel centru y denunció repetidamente, énte la Inspeición de Trabayu, les illegalidaes llaborales, los abusos empresariales, les sanciones inxustificaes, l’acoso llaboral, les amenaces y les coaiciones, per parte la empresa, sobre les trabayadores en xeneral, sobre les impulsores de la cellebración de les eleiciones sindicales y, especialmente, sobre les trabayadores pertenecientes al sindicatu Corriente Sindical d’Izquierda.

Les condiciones de trabayu pa estes trabayadores fáense insoportables (tando inclusive dalgunes d’elles de baxa por depresión, ansiedá, etc.), teniendo de soportar actitúes, per parte la empresa, tan graves como un siguimientu refechu per parte la supervisora desque entama la xornada hasta que termina, situándose inclusive a dos metros de les trabayadores.

Amás a estes trabayadores castígase-yos imponiéndose-yos más carga trabayu qu’al restu d’emplegaes. Tamién se-yos aislla sistemáticamente nel trabayu n’estancies onde elles s’atopen soles con pacientes violentos. A estes trabayadores de la CSI amenacióse-yos delles vegaes col despidu y un “atente a les consecuencies, nun me va tremar la mano” pol fechu de promover les eleiciones sindicales pa tener un comité d’empresa y unes delegaes de prevención inesistentes hasta esi momentu.