¿Práctiques voluntaries non remunerades nos Premios princesa? Y eso ¿qué ye?

EL GOBIERNU ASTURIANU, LA FUNDACIÓN PREMIOS PRINCESA Y LA INSPEICIÓN DE TRABAYU NUN PUEDEN MIRAR HACIA OTRU LLAU.

La Direición del Centru Integráu de Formación Profesional d’Hostelería y Turismu d’Asturies reconoció la esistencia d’un conveniu de collaboración que caltién cola empresa del Hotel de la Reconquista pa que los sos alumnos realicen práutiques voluntaries non remuneraes nesi establecimientu con ocasión de los premios Princesa de Asturias.

La llexislación llaboral reconoz los contratos de Formación y Aprendizaxe y los contratos en Práutiques. Como cualisquier rellación llaboral, incluyíes les de formación, aprendizaxe y práutiques, dicha rellación llaboral sofítase na esistencia d’un contratu que tien de respetar la normativa llaboral vixente. Esto ye, el contratu tien d’esistir, tien de pagase un sueldu, tien d’afitase una xornada llaboral y tienen de dase les altes na Seguridá Social de los y les trabayadores contrataes, asina como abonase les cuotes correspondientes, todo ello d’alcuerdu col Conveniu Coleutivu esistente.

Fora d’ello, yá nun tamos falando d’una relación llaboral, sinón d’una situación irregular, cuando non illegal ya, inclusive, fraudulenta.

Nel enllaz que vos dexamos, apaecen tolos tipos de contratos qu’una empresa puede realizar y les condiciones llegales que deben d’acatar. (los contratos en práutiques y de formación apaecen, respeutivamente, nes páxines 128 y 116).

Nenyures apaez esa estraña figura de práutiques voluntaries non remuneradas”, na que se basa’l conveniu calteníu pel Centru Integráu de Formación Profesional d’Hostelería y Turismu d’Asturies y la empresa Hoasa, que xestiona l’Hotel de la Reconquista. Más bien paez una situación illegal na que s’esplota llaboralmente a los y les trabayadores, abellugándose nuna figura inesistente de rellación llaboral, fora dafechu de la llegalidá llaboral vixente y que podría dar llugar a un delitu de fraude.

Resulta dafechu impresentable que’l Gobiernu asturianu, accionista mayoritariu de la empresa Hoasa que xestiona l’Hotel de la Reconquista, se torne en cómpliz d’esta situación. A la escontra, tien la obligación de tomar cartes nel asuntu y torgar esti tipu de práutiques illegales y fraudulentas del empresariáu hosteleru.

De la mesma manera, la Fundación Premios Princesa nun puede caltenese ayena a la esistencia d’estes situaciones nos eventos y actividaes que desendolca y tien de garantizar l’escrupulosu cumplimientu de la llegalidá llaboral vixente na contratación de los y les trabayadores que desenvuelven la so actividá llaboral en dichos eventos y actividaes.

Dende la Corriente Sindical d’Izquierda consideramos que tanto’l Gobiernu asturianu como la Inspeición de Trabayu, tienen d’intervenir darréu y garantizar que, non solamente los eventos de la Fundación Premio Princesa, sinón el conxuntu del empresariáu hosteleru asturianu, cumplan la llegalidá llaboral vixente nes contrataciones de los y les trabayadores.

https://www.google.es/url?sa=t&rct=j&q=&esrc=s&source=web&cd=3&cad=rja&uact=8&ved=0CDAQFjACahUKEwij89f7x7rIAhWBvRoKHeW_Ah8&url=https%3A%2F%2Fwww.sepe.es%2Fcontenidos%2Fque_es_el_sepe%2Fpublicaciones%2Fpdf%2Fpdf_empleo%2Fguia_contratos.pdf&usg=AFQjCNHuI5KfyygS8-S45IxzeEpKgnEfwQ&sig2=Pxk5nSAt-mXZuJpfotI9cg