La CSI propón a los Ayuntamientos que dexen de “blindase llegalmente” y blinden los derechos de los y les trabayadores

CSI-PLANES D’EMPLÉU

LA CSI PROPÓN A LOS AYUNTAMIENTOS QUE DEXEN DE “BLINDASE LLEGALMENTE” Y BLINDEN LOS DERECHOS DE LOS Y LES TRABAYADORES

Nos últimos díes la prensa asturiana ye un fervideru de noticies sobre los “problemes llegales” que tán atopando los Ayuntamientos pa convocar los próximos Planes Llocales d’Empléu énte l’avalancha de denuncies, sentencies e indemnizaciones que tá teniendo y va tener llugar. Lo mesmo’l presidente de la Federación Asturiana de Conceyos que l’Ayuntamientu Xixón falen públicamente de buscar cambeos pa “blindase énte futures demandes”. Dende CSI-Planes d’Empléu queremos facer unes cuantes valoraciones y reflexones tres los últimos acontecimientos.

En primer llugar, queremos denunciar estes declaraciones como vergoñoses, cafiantes y mui esclarecedores. A los voceros d’estes instituciones-yos acaba de fallar el subconsciente y amuesen la so braera cara, que nun ye la d’asegurar a los y les trabayadores unes condiciones dignes de trabayu y un sueldu afayáu al llabor que desempeñen, sinon “blindase” pa que les condiciones lleonines que sufren los personales de los estremaos Planes d’Empléu Llocales nun puedan denunciase. Desiximos a estes instituciones que dexen de blindase a elles mesmes y blinden los derechos de los y les trabayadores, y que aseguren un empléu dignu y con derechos a tou’l personal al so cargu, lo mesmo temporales que fixos.

Les, pel momentu, alredor de 500 demandes xudiciales que recibirán los ayuntamientos de Xixón, Uviéu, Siero, Mieres, Llangréu, Villaviciosa, Cabranes y Grao tienen el so orixen nel calter fraudulentu de los contratos por obra y serviciu fechos a estos y estes trabayadores. Contrataciones supuestamente feches pa dar formación y esperiencia y que en realidá encubren la cobertura de necesidaes de plantilla de los estremaos ayuntamientos mediante’l personal contratáu nos Planes d’Empléu. En realidá nun son los ayuntamientos quienes ufren formación y esperiencia a los y les trabayadores sinon que, mui pel contrariu, persones con formación y esperiencia acreditaes pa poder acceder a los Planes d’Empléu aseguren la correcta realización de les tarees que-yos son encamentaes énte la falta evidente de personal nes distintes plantilles municipales.

Otra de les supuestes finalidaes d’estos planes, la “inserción llaboral de persones con dificultá d’accesu al mercáu llaboral”, nun ye más que otra forma de mentir a la xente y d’intentu de xustificación de les sos nefastes polítiques en materia llaboral nes últimes décades. Con unes alministraciones llocales y asturiana impasibles, y en munchos casos cómplices, del desmantelamientu industrial ensin alternatives, de les desllocalizaciones, la emigración de miles de mozos y non tan mozos, titulaes y ensin titular, la destrucción del sector primariu, la perda de miles de puestos de trabayu en servicios públicos como sanidá o educación, y nun país, Asturies, con una tasa del 20% y casi 90.000 persones en paru y una tasa de paru xuvenil superior al 50%… querer facer culpables a los y les trabayadores de la so “dificultá d’accesu al mercáu llaboral”, ye d’auténticos sinvergüences y digno d’unos y unes representantes públicos que viven alloñaos de la realidá.

Por too ello dende CSI-Planes d’Empléu desiximos, una vegada más, a los representantes llocales y asturianos que busquen formules xurídiques y realicen les xestiones afayaíces non pa blindase, sinon pa asegurar un empléu públicu dignu y con derechos, que repercuta na calidá de vida de los y les trabayadores y nun correctu furrulamientu de los servicios públicos que han asegurar les distintes alministraciones. Como primer pasu, trabayar pa algamar el desbloquéu de les convocatories públiques d’empléu que permitan a los Ayuntamientos dotase del personal necesariu mediante oposición y/o concursu-oposición, y nun siguir, como yá reconocen públicamente, contratando a personal temporal pa cubrir puestos estructurales y de plantilla. Hasta’l momentu d’estes convocatories los Ayuntamientos han convertir n’indefiníos non fixos, o realmitir nel so casu, a los y les trabayadores cuyos contratos actuales o recién acabaos fueron realizaos en fraude de llei y que yá tán realizando los trámites alministrativos y llegales pa que asina se-yos reconoza. Porque, d’otra manera, ¿cómo piensen cubrir eses necesidaes de plantilla que yá reconocen públicamente? ¿Doblando les tarees del personal fixu? ¿Privatizando servicios pa regalar perres a empreses privaes? ¿O cenciellamente nun van facer nada y van dexar que siga deteriorándose la calidá de los servicios públicos?

Por último, pero nun menos importante, dende CSI-Planes d’Empléu queremos facer un llamamientu a toos aquellos alcaldes, conceyales d’empléu y miembros firmantes por CCOO y UGT de los distintos convenios colectivos de Planes d’Empléu, a que faigan una fonda reflexón del dañu que ficieron durante una década a miles de trabayadores al contratales en condiciones fraudulentes y precaries y que, si-yos queda dalgo de dignidá, pidán perdón polos errores cometíos y, nel so casu, dimitan de los sos cargos.