Comunicau de la Corriente Sindical d’izquierda

Énte les informaciones asoleyaes en dellos medios de comunicación alrodiu l’incendiu d’una sucursal de Caxastur/Liberbank en Xixón y la so posible relación con “el sindicalismu radical” y los xuicios a sindicalistes pola so participación en piquetes informativos demientres les fuelgues xenerales, la CSI quier sopelexar:

1-Que ye sorprendente la rapidez cola que, dende dellos medios de comunicación, s’estableció una rellación ente esti incendiu y los sos posibles responsables, apuntando de forma casi inequívoca escontra’l “sindicalismu radical”.

2-Que, sicasí, con prebes inequívoques y sentencies xudiciales firmes, paez imposible que nin los medios de comunicación nin los investigadores policiales puedan atopar rellación dalguna ente’l saquéu de les Caxes d’Aforru y, en concretu, de Caxastur/Liberbank y los posibles “direutivos radicales” que pudieren ser responsables de dichu saquéu, gociando de la más absoluta impunidá.

3-Que les mancadures y agresiones denunciaes polos sindicalistes que nin siquier fueron imputaos o que fueron absueltos, esto ye, que resultaron inocentes de cualquier falta o delitu y que, en dalgún casu, precisaron d’intervención quirúrxica, fueron archivaes direutamente, ensin que se realizara dengún tipu d’investigación

Nesti sen, echamos de menos una investigación policial y periodística que rellacione estes mancadures colos posibles agresores y la so redolada. N’ausencia d’estes investigaciones, vamos tener que creer que diches mancadures fueron autoinflixíes.

4-Que la entrada illegal de la UIP na Casa Sindical de Xixón, tampoco foi oxetu de dengún tipu d’investigación policial o periodística alrodiu les sos posibles consecuencies llegales. Otra vegada, el doble raseru investigador garantiza la impunidá de los delitos que pudieren habese cometío nesa actuación de la UIP.

5-¿Vamos poder ver dalgún día investigaciones policiales y periodístiques asemeyaes, tan rápides y fulminantes, sobre los responsables de los desahucios, les obres d’El Musel, los Fondos Mineros, los accidentes llaborales mortales, los casos de corrupción o del propiu saquéu de Caxastur/Liberbank?.

¿Daquién maxina una noticia periodística que dixera, por exemplu: “Les investigaciones policiales señalen a la redolada de “la patronal más radical y contundente” como posible responsable de tal o cual accidente llaboral?. ¿Y a la redolada “más radical y contundente” del Gobiernu como responsable de tal o cual casu de corrupción?. ¿Y a la redolada “más radical y contundente” de la Banca como responsable de tal o cual desahuciu?. Non, nunca vamos ver nin eses investigaciones nin eses noticies.

6-Que, de toes formes, na Corriente Sindical d’Izquierda tamos avezaos a que se nos responsabilice de cualisquier incidente o sucesu d’esti tipu y a que s’utilice pa tratar de quitar del mediu a un sindicatu que, pola so defensa de los derechos de los y les trabayadores, ta tornándose nuna auténtica estobisa pa los auténticos criminales que dirixen esta sociedá.