Enorme sofitu popular a los procesados pola Fuelga Xeneral del 14 N, durante la celebración del xuiciu

Centenares de persones allegaron en sofitu a los procesaos pola fuelga xeneral del 14P, na cellebración del xuiciu que se desendolcó demientres tola mañana de güei.

La mañana entamaba con una plaza atarraquitada de persones sofitando a los trabayadores procesaos y desixendo la so absolución.

Anantes d’entamar la vista, trés de los procesaos algamaron un alcuerdu cola fiscalía y l’acusación particular, polo que la sentencia va saldase con 6 meses de prisión y multa de 1.440 € pa caún.

Darréu, la fiscalía terminó por retirar tolos cargos pa otru de los procesaos, pero caltuvo’l pidimientu de 1 añu y 6 meses de prisión pa los otros dos.

Demientres la cellebración de la vista, l’actuación de les abogaes de la defensa, asina como los testimonios de los testigos y les prebes presentaes, asoleyaron les enormes imprecisiones y contradicciones nes que cayíen les declaraciones policiales a la d’ufiertar un relatu coherente de los fechos o identificar afechiscamente a los procesaos.

N’Asturies en Pie talantamos que too ello nun fai otra cosa que dar a la razón a quien desixíamos y, agora con más razones entá, siguimos desixendo l’absolución de tolos procesaos por participar na fuelga xeneral del 14P.

Dende Asturies en Pie, dende la Corriente Sindical d’Izquierda y dende’l FUSOA, queremos unviar el nuesu agradecimientu a toles organizaciones, coleutivos y persones que, dende Asturies, dende’l conxuntu del Estáu, el restu d’Europa y Llatinoamérica, tuvieron sofitando a los trabayadores procesaos demientres toos estos meses.

Pa terminar, queremos empobinar un saludu bien especial al sindicatu Solidaridá Obrera y a la Plataforma de Sofitu a Alfon, que tuvieron presentes n’Asturies demientres tola mañana, acompañándonos, amosándonos la so solidaridá y dándonos puxu en tou momentu.

¡LA LLUCHA SIGUE!. ¡LLIBERTÁ Y ABSOLUCIÓN PA TOLES PERSONES ENCAUSAES POR LLUCHAR!

¡PUXA LA LLUCHA DE LA CLAS OBRERA!