Solidaridá de los petroleros de las Heras (Argentina) colos procesados pola Güelga xeneral del 14 N

(4 obreros petroleros arxentinos fueron condergaos a cadena perpetua y otros 6 a 5 años de prisión, víctimes d’un montaxe preparáu p’acusalos de la muerte d’un xendarme y desactivar les multitudinaries movilizaciones de los trabayadores petroleros, que poníen en pelligru los intereses de les multinacionales del petróleu n’Arxentina. Asturies en Pie y la CSI realizaron, delles movilizaciones de solidaridá. Anguañu tán en llibertá pendientes de confirmación de sentencia).

COMUNICÁU DE LA COMISIÓN DE TRABAYADORES, FAMILIARES Y AMIGOS DE LAS HERAS A LOS COMPAÑEROS Y COMPAÑERES D’ASTURIES EN PIE Y LOS 6 COMPAÑEROS PROCESAOS NEL 14P

Somos conscientes de que magar cai sobre nós una brutal conderga, tamos llibres gracies a la enorme solidaridá y llucha de cientos d’organizaciones obreres y estudiantiles n’Arxentina y el mundu como les qu’ustedes realizaron. Recordamos la solidaridá qu’ustedes tuvieron con nós.

Eses aiciones tán y van tar siempres nos nuesos corales. Ye por esto que güei queremos ponenos en pie xunta los compañeros d’Asturies que quieren condergar por lluchar, tal como lo fiximos colos compañeros de la Palestina ocupada pol sionismu, con los mineros de Marikana, los padres, familiares y compañeros de los 43 estudiantes de Ayotzinapa en México, los obreros portuarios de Chile, la familia de Michael Brown n’EEXX qu’entá clamen xusticia y toles organizaciones de trabayadores que lluchen polos sos derechos.

Sabemos que nada bono va venir de dengún xuez, fiscal o institución de xusticia de los mesmos que nos ataquen, nos asesinen, nos encarcelen y saqueen los nuesos recursos. Esta ye una xusticia y una democracia pa ricos y poderosos, onde somos les y los trabayadores primíos quien sufrimos y a quien nos estrumen el nuesu sudu y la nuesa sangre pa engordar los sos bolsos.

Queremos qu’al traviés d’ustedes, faigan llegar el nuesu calorosu abrazu y saludu a los compañeros procesaos d’Asturies y tolos y toles trabayadores del Estáu Español y hermanar la nuesa llucha cola de so, porque ye la mesma llucha pola absolución.

Un saludu a toos y toes ¡Sigamos lluchando xuntos y xuntes percima de les fronteres! ¡La rebelión de los esclavos y esclaves nun ye delitu, ye xusticia!