Concentración pola Absolución de los procesaos na Fuelga xeneral del 14N

Asturies en Pie entama una concentración pola absolución de los procesaos na fuelga xeneral del 14P, que va tener llugar el viniente sábadu 19 setiembre, a les 19:30 h., na plaza’l teatru Campoamor d’Uviéu.

El viniente 28 setiembre, van ser xulgaos 6 trabayadores pola so participación nos piquetes informativos de la fuelga xeneral del 14-P (d’ente ellos, 4 militantes de la CSI y ún del FUSOA), con un pidimientu conxuntu de 12 años de prisión.

Demientres la fuelga xeneral del 14 payares de 2012, la UIP (los antidisturbios) cargaba ensin denguna xustificación sobre un piquete informativu de la CSI y la CXT ya invadíen la Casa Sindical de Xixón, de forma illegal dafechu, dexando a delles persones mancaes, que tuvieron de ser atendíes por xunidaes móviles del SAMU.

Cuatro persones fueron deteníes y otres dos, imputaes. El so delitu nun foi otru que participar nuna fuelga xeneral, entamada pa defender los derechos más básicos: trabayu, alimentos, vivienda, sanidá, educación, servicios sociales… A la fin, lo mínimo necesario pa llevar una vida digna.

Estes detenciones prevocaron que miles de trabayadores arrodiaren la comisaría de Xixón demientres delles hores, hasta la so puesta en llibertá.

De resultes de too ello, agora, seis persones enfréntense a xuicios con pidimientos fiscales que, en xunto, superen los 12 años de prisión. Sicasí, nin una sola de les denuncies interpuestes poles persones afrellaes pola policía, foi siquier almitía a trámite, magar que los partes médicos destacaben la gravedá de les mancadures que, en dalgún casu, precisaron d’intervención quirúrxica.

Nel conxuntu l’Estáu español, son centenares los y les trabayadores condergaes o encarcelaes por participar nes estremaes convocatories de fuelga realizaes demientres estos años.

Ye necesario recordar qu’anguañu esisten pidimientos de cárcel importantes. Amás de los pidimientos de prisión pa los encausaos nel 14-P, los 5 mineros de Zarréu atópense condergaos a prisión por socorrer a dellos compañeros accidentaos y, solamente dende ¡Asturies en Pie!, deféndese la causa de numberosos persones que, pola so participación nes movilizaciones llaborales y sociales, atropen pidimientos fiscales que, en xunto, pueden superar los 50 años de prisión.

Nel conxuntu d’Asturies, tamos falando de decenes y decenes de persones encausaes, que podríen atropar un pidimientu fiscal de más de 300 años de prisión, que ponen en xuegu non solamente los derechos básicos que se defenden, sinón el mesmu derechu a la protesta, el derechu a la fuelga y el derechu a participar en piquetes informativos.

(Formen parte de ¡Asturies en Pie!: CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU, CENTRU SOCIAL LA LLUME, ESPACIU LA LLEGRA, DARRÉU, MIERES EN LLUCHA).