Llamamientu a tola afiliación de la CSI a participar en tolos actos de sofitu a los compañeros imputados en la Huelga General del 14 N

Tamos na recta final antes del xuiciu que van tener, el día 28 de setiembre, los compañeros imputaos pola Fuelga Xeneral del 14 N del 2012 y dende la CSI faemos un llamamientu a tola afiliación pa sofitar a estos compañeros. Tenemos que consiguir faer la mayor presión posible y que estos compañeros salgan absueltos. Nun tenemos de dexar que nenguna persona que llucha quede sola ante la represión. Recordar qu’estos compañeros fueron deteníos ya imputaos nuna Fuelga, nun piquete informativu de la CSI. Aquel día consiguimos sacalos de comisaria. Güei tenemos de torgar que los zarren na cárcel.
Toos y toes sabemos por qué nos sumamos a la fuelga xeneral, y por qué tabemos nes cais. Toes y toos sabemos tamién que tenemos de defender los derechos que nos tán arrampuñando. Nun fai falta volver cuntanos tolos males que carecemos la clase obrera. Lo que sí fai falta ye recordar qu’ensin la solidaridá y el sofitu nun podríamos lluchar. Nin nel puestu de trabayu, nin na cai. Como dicía Luis Redondo “O salvamos cola alma colectiva, o cola alma individual vamos toos al infiernu”. Dacuando escaézsenos. Dacuando les diferencies pesen más que lo que nos xune. Pero hai momentos en que tolo que nos dixebra nun tien importancia, porque somos nosotrxs, toos y toes, contra la represión. Cuando hai compañeros deteníos ya imputaos, la respuesta tien que ser contundente. Porque sinón protexemos, sinón sofitamos, si danos igual que compañeros puedan dir a la cárcel, entós somos igual que CCOO y UXT, o que cualquier sindicatu u organización del sistema. Si les persones que lluchen nun van tener el sofitu de toes y toos, la llucha faise insostenible, porque nun vamos quedar naide, la represión venceríanos.
Por eso la importancia de dar respuestes colectives y contundentes, como se fixo siempres nestos casos. Porque la nuesa capacidá de llucha y de resistencia depende de la solidaridá y el sofitu….

¡Si tóquennos a unx, tóquennos a todxs!
¡14 N Absolución!
¡Llibertá pa les persones que lluchen!

Na sección convocatories tán tolos actos de sofitu a estos compañeros.

Participa y espubliza.