L’ayuntamientu de Tinéu apreba na moción na que se pide l’Absolución de los 5 mineros de Zarréu

Colos votos favoratibles de PSOE, SOTI, FAC ya IX y l’astención del PP, el Plenu ‘l Conceyu Tinéu aprebó una moción na que s’amuesa la esmolición de los Grupos Municipales pola entrada en prisión de los 5 mineros de Zarréu, asina como pola previsible alarma social que dicha situación podríe prevocar.

D’esta forma, el Plenu’l Conceyu Tinéu fixo públicu’l so pidimientu d’absolución pa los 5 mineros de Zarréu.

TESTU DE LA MOCIÓN:

Nun hai denguna dulda de que la llamada cris castigó y castiga duramente al conxuntu la ciudadanía y, bien especialmente, a la clas trabayadora y a les capes menos favorecíes de la sociedá.

El seutor del carbón nun corrió meyor suerte. L’amenorgamientu tantu de les aídes direutes como de la mesma produición de carbón, dio llugar a un enorme amenorgamientu de les inversiones nel seutor, concretándose too ello nuna enorme perda d’empléu direutu ya indireutu, qu’afeuta, non solo a les cuenques mineres, sinón al conxuntu la economía asturiana.

Una de les consecuencies más graves d’esta cayida de les inversiones, ye l’amenorgamientu’l gastu en materia Prevención y Seguranza Llaboral, col consiguiente aumentu de los accidentes llaborales.

Con estes premises y nel contestu de la pasada fuelga de la minería, el 12 xunetu de 2012 tuvo llugar un accidente llaboral na Mina Zarréu, nel que se vieron afectaos trés trabayadores.

Cientos de persones, compañeros de trabayu y vecinos y vecines de la zona, allegaron al llugar de los fechos, interesándose pol estáu de salú de los trabayadores accidentaos y siendo testigos d’una actuación irregular del responsable de la empresa, al marxe los servicios mélicos, que faía correr un riesgu innecesario a los trés trabayadores accidentaos.

Los compañeros de trabayu y los vecinos de la fastera qu’allegaron al llugar del accidente, trataron d’evitar un mal mayor, poniendo a los trés trabayadores accidentaos en manes de los servicios mélicos.

ÉNTE ESTOS FECHOS, EL PLENU RESUELVE:

1-Amosar la so esmolición pola posible entrada en prisión de los cinco mineros de Zarréu, condergaos a 2 años y mediu prisión, asina comu pola previsible alarma social que dicha situación podríe prevocar.

2-Constatar el so comencimiento de la inocencia de los 5 mineros de Zarréu y de que la so actuación demientres l’accidente llaboral del 12 xunetu de 2102, tuvo empuesta puramente a socorrer afechiscamente a los trabayadores accidentaos.

3-Faer públicu’l so pidimientu d’absolución nel procesu que se sigue escontra los 5 mineros de Zarréu.