Justo Braga enllamuerga entá más la escasa credibilidá que-y queda a la UGT

JUSTO BRAGA ENLLAMUERGA ENTÁ MÁS LA ESCASA CREDIBILIDÁ QUE-Y QUEDA A LA UXT

La Corriente Sindical d’Izquierda quier salir al pasu de les declaraciones realizaes a los medios de comunicación pol Secretariu Xeneral de la UXT, Justo Braga, nes que calificaba de “lliberaos, fascistes y matones” a los militantes de la CSI, especialmente al delegáu sindical de la CSI en Caxastur/Liberbank, Marcu Antuña, arriendes de la concentración de protesta realizada poles Asamblees de Trabayadores y Trabayadores en Llucha en Asturies, na inauguración de la Escuela de Branu de la UXT.

De primeres, queremos recorda-y a Justo Braga que la Corriente Sindical d’Izquierda tien prohibida la esistencia nel so senu de lliberaos sindicales y, nel casu de que dalgún afiliáu o afiliada, al traviés de dalguna escura biliguera, pudiere lliberase, el so destín taría bien nidio: la espulsión darréu del sindicatu.

Nesi sen, dende la CSI afalamos a la UXT a faer lo mesmo y entrugámonos si Justo Braga aceptaría una investigación a fondu pa pescudar el verdaderu númberu d’afiliaos que componen l’exércitu lliberaos a tiempu total que caltien la UXT al traviés de les hores sindicales o enchufaos, con sueldos millonarios, en conseyos d’alministración, comités intercentros y organismos de l’Alministración autonómica, estatal y europea.

Dexamos en manes de la Xusticia y de la OCU (unidá policial encargada de la corrupción y el crime organizáu) les investigaciones y procesos xudiciales que tán llevándose a cabu alrodiu’l financiamientu del sindicatu UXT n’Asturies.

Nun ye la primer vegada que Justo Braga califica de fascistes a los y les militantes de la CSI. Demientres el conflictu de Tenneco, el dirixente de la UXT repitió los mesmos insultos cuando l’asamblea trabayadores d’esta empresa torgó les negociaciones de la UXT cola direición de la empresa y desendolcó un llabor sindical alternativu, que torgó’l zarru patronal.

Justo Braga califica de matón e intimidador a Marco Antuña. Sicasí, tolos medios de comunicación fueron testigos de cómo Marco Antuña, na inauguración de la Escuela de Branu d’UXT, utilizó armes tan tarrecibles como un megáfonu, una pancarta y la simple pallabra, p’apavoriar a tou un sindicatu mayoritariu con miles d’afiliaos.

A esti respeutu, munchos y munches trabayadores podríen falar de matonismu. De cómo se faen “veceros” enchufando familiares o creando chiringos p’amiguetes. De cómo se favorez el despidu de quien se presenta a les eleiciones sindicales en candidatures opuestes o de cómo s’amenacia a quien, a cencielles, propónense votar a otru sindicatu.

Estos trabayadores podríen acusar d’estes práutiques a ciertos sindicatos, pero nunca a la Corriente Sindical d’Izquierda nin a dengún de los sos afiliaos y afiliaes.

Pa la CSI, la trayeutoria sindical de Marco Antuña ye un arguyu y un exemplu, non solo pal nuesu sindicatu, sinón pa la mayoría de trabayadores que dieron el so enfotu a la llista testerada por él nes acabantes eleiciones sindicales y tornaron a la CSI nel sindicatu mayoritariu de Caxastur. Nesi sen, na CSI tenémoslo nidio: toes y toos somos Marco Antuña.

Precisamente, ye en Caxastur, onde Justo Braga y l’UXT roblaron, escontra la voluntá de los y les trabayadores, dos EREs fraudulentos, ún de los cualos foi declaráu nulu polos tribunales y l’otru, ta a la espera sentencia. En dambos casos, fueron les demandes presentaes pola CSI les que salieron en defensa de los derechos de los y les trabayadores de Caxastur.

Diz tamién Justo Braga que les actuaciones de la UXT tán sofitaes pola llexitimidá que-y dan los sos miles d’afiliaos, demientres que les Asamblees de Trabayadores “nun tán validaes”.

Pero Justo Braga paez escaecer qu’esa llexitimidá piérdese cuando s’utiliza pa roblar despidos, EREs, pieslles d’empresa, convenios y pautos sociales qu’amparen la precariedá y la esplotación llaboral. Nesti sen, el sistema pa financiase ye cenciellu: convéncese a los y les trabayadores de que l’ERE, el concursu acreedores o los despidos son inevitables; apáutense cola patronal, róblense y autoricen y, de siguío, faise caxa cobrando a los y les trabayadores un tanto por cientu de les indemnizaciones algamaes.

Los EREs, los concursos d’acreedores, los despidos coleutivos, esto ye, los preseos que la lexislación llaboral pon en manes de los empresarios pa desaposiar a los y les trabayadores de los sos puestos de trabayu y de la so única forma de ganase la vida, tendríen d’atopase con una torga insalvable: les organizaciones sindicales.

Sicasí, la UXT non solamente nun ye, n’absolutu, una torga, sinón que se torna nun preséu más del procesu despidu, emprestándose a faer el trabayu puercu, apautando miles de despidos cola patronal y, a lo cabero, faciendo que los dirixentes d’esti sindicatu, más qu’ufiertar soluciones a los y les trabayadores, acaben siendo una parte perimportante de los sos problemes.

Cientos d’empreses pasaron por esta situación coles tarrecibles consecuencies del zarru y la perda puestos de trabayu. Sicasí, en delles ocasiones, los y les trabayadores reaccionaron separtando a les direiciones sindicales y garrando les sos propies decisiones; constituyendo asamblees permanentes, negándose a axustar los sos despidos y calteniendo la conservación de los puestos de trabayu como única reivindicación.

Pa Justo Braga, estes asamblees “nun tán validaes” y nun tienen llexitimidá democrática. Pero, ¿dende cuando, non yá una asamblea, sinón un solu trabayador o trabayadora escarez de llexitimidá cuándo defende’l so puestu de trabayu?, ¿dende cuándo caltién la so llexitimidá un sindicatu que non solo nun defende los puestos de trabayu, sinón que collabora cola patronal nel procesu despidu?.

El recién casu de Modultec-Imasa ye un bon exemplu d’ello. La UXT redacta una carta defendiendo los 42 despidos roblaos pola mesma UXT y convoca una asamblea esclusivamente pa los trabayadores que nun fueron despidíos col oxetivu de que la roblen.

En dicha carta, redactada por UXT, los firmantes “espresen el so agradecimientu al Comité d’Empresa y los sindicatos pol so sofitu énte’l procesu concursal nel qu’entró la compañía y que terminó col despidu de 42 persones”. A última hora, la llexitimidá de la UXT, sofítase en 50 trabayadores qu’estimen y collaboren nel despidu d’otros 42.

A Justo Braga no le tembló el pulso a la hora de aplicar a sus propios trabajadores y trabajadoras, la Reforma Laboral contra la que, precisamente, la UGT convocó una huelga general.

A Justo Braga nun-y tremó’l pulsu nel intre aplicar a los y les sos propies trabayadores, la Reforma Llaboral escontra la que, precisamente, la UXT convocó una fuelga xeneral. Por eso na CSI nunca esperamos otru comportamientu d’un Secretariu Xeneral de la UXT, como Xusto Braga, que, dempués de ver cómo los xulgaos declaraben nulu l’ERE que la mesma UXT pretendía aplicar a la so plantía, foi alvertíu na mesma sentencia xudicial de que s’abstuviera de siguir coles sos amenaces a los y les trabayadores que presentaron les demandes llaborales; unes demandes que, según pallabres testuales de Justo Braga, “representen una cantidaes de dineru coles que llimpio’l culu tolos díes”. ¿Nun ye too esto fascismu y matonismu?.

Pa la CSI, los afiliaos y afiliaes de la UXT tendríen de tomar cartes nesti asuntu y forzar la dimisión del so Secretariu Xeneral, Justo Braga, enfotáu en soterrar nel fango les sigles d’un sindicatu, la UXT, que la so hestoria merez otru final estremáu al que paez tar embocáu.