Suspendida la concentración pola Absolución de los procesaos na Fuelga xeneral del 14 P del 2012, convoca Asturies de pie

UN TROPIEZU NEL CAMÍN, QUE NUN VA PARAR LA NUESA LLUCHA

UN ERRU NA COMUNICACIÓN, PER PARTE’L DESPACHU PROCURADORES, DEXA AL TSXA SOBRESEER EL RECURSU D’ASTURIES EN PIE ESCONTRA LA PROHIBICIÓN DE LA CONCENTRACIÓN POLA ABSOLUCIÓN DE LOS PROCESAOS NA FUELGA XENERAL DEL 14P

ASTURIES EN PIE SUSPENDE LA CONCENTRACIÓN Y VA CONVOCAR UNA NUEVA MOVILIZACIÓN EL PRÓXIMU VIENRES 18 DE SETIEMBRE, A LES 19:30 h. NA PLAZA’L CONCEYU D’AVILÉS

Un erru, ayenu a Asturies en Pie, nes comunicaciones realizaes pol Despachu Procuradores encargáu del casu, torgó a esta organización asistir a la vista xudicial sobre’l recursu presentáu escontra la prohibición gubernativa de la concentración pola absolución de los procesaos na fuelga xeneral del 14P, polo que’l Tribunal Superior de Xusticia d’Asturies dio la causa por sobreseída y, d’esta forma, la prohibición del Delegáu de Gobiernu va siguir vixente.

Magar esti erru que, repitimos, ye ayenu dafechu a Asturies en Pie, consideramos que la responsabilidá d’esta prohibición recai fundamentalmente nel Conceyu d’Avilés y na Delegación de Gobiernu, que los sos informes y prohibiciones escarecen de fundamentu llegal dalgún pa torgar l’exerciciu’l derechu fundamental de xunta y manifestación.

Nun basta cola cellebración d’actos festivos o’l meru barruntu de que les xuntes o concentraciones puedan producir alteraciones nel orde públicu o riesgos pa la seguranza de persones y bienes, sinón que la prohibición d’un derechu fundamental tien de sostenese en razones fundaes y en datos oxetivos enforma que permitan prever, con una alta certidume, diches alteraciones del orde públicu.

Nun ye esti’l casu y, por ello, queda nidio que se sigue cola estratexa de conculcar y desaniciar los derechos y llibertaes públiques pela vía la prohibición.

Sicasí, p’Asturies en Pie, esti tropiezu nun significa nengún parón na so llucha, tantu por dichos derechos y llibertaes públiques, como pola esixencia de l’absolución pa toles persones procesaes pola so participación na fuelga xeneral del 14P.

Por too ello, Asturies en Pie tornará entamar una nueva movilización el vienres 18 setiembre, a les 19:30 h., na plaza’l Conceyu d’Avilés.