Concentración polos drechos del profesoráu interinu

CSI-EDUCACIÓN

POLA PRÓRROGA CONTRATU EN SECUNDARIA. POLA UFIERTA DE TOLES VACANTES EN PRIMER CONVOCATORIA.

La Conseyería d’Educación sigue colos sos planes de precarización del sistema educativu asturianu.

Otru añu más, la Conseyería d’Educación esperimenta col profesoráu interín planes pa optimizar los sos recursos. Magar les pallabres grandilocuentes nos sos discursos eleutorales, el Gobiernu de Javier Fernández sigue metiendo tisoria nel sistema educativu asturianu. Como siempres, el coleutivu interín ye l’oxetu d’estos retayos.

El cambéu del sistema contratu pal profesoráu eventual nel cursu 2014-2015 amenorgaba en 12 díes la contratación de los y les docentes asturianas, quitándo-yos del derechu a rematar el cursu escolar, qu’acaba una vegada concluyida la evaluación estraordinaria de setiembre. Esta midía suponía dende’l principiu un caos y un esbarafuste nesti procesu d’evaluación al obligar al profesoráu con plaza a asumir la carga trabayu del profesoráu interín cesáu.

Amás traía una amenorga nel derechu a evaluación del alumnáu y les sos families, cuidao que nun va poder ser evaluáu pol mesmu profesoráu que-yos impartió la materia demientres el cursu. Esti esperimentu ufiertaba situaciones bien variopintes, como les sufiertes por departamentos onde l’únicu docente con plaza tendría qu’evaluar a tol alumnáu del centru o por departamentos constituyíos namás por profesoráu interín.

Énte les quexes plantegaes polos coleutivos d’enseñanza y les quexes de dellos claustros, la Conseyería d’Educación llanza’l so calendariu d’entamu de cursu, onde pretende esclariar la situación y enmendar l’entuertu. Nestes instruiciones del 15 xunetu, el periodu pidimientu y alxudicación de plaza amenórguense, siendo los periodos de pidimientu más curtios, 3 díes, y datando l’alxudicación pal día 31 y la incorporación al centru pal día 1 de setiembre.

Como sabemos d’otros años, el sistema de pidimientu ta suxetu a cuantiosos erros.
Nun ye la primer vegada que se producen irregularidaes prevocaes polos defectos del serviciu informáticu. Pa mayestros y mayestres que nun tienen periodu estraordinariu d’evaluación, supón la incorporación nel so destín ensin antelación, sometiendo otra vegada a esti coleutivu a una incorporación rescamplu al so llugar de trabayu.

Nel casu’l coleutivu secundaria, el picu rabicu ye triple mortal, pos la Conseyería obliga al profesoráu interín con plaza alxudicada a incorporase a los sos antiguos centros de trabayu pa llevar a cabu la evaluación estraordinaria. Esto provoca una irregularidá llaboral, cuidao que dambos coleutivos de docentes van trabayar ensin contratu dellos díes y, nel casu del profesoráu de secundaria, van tener de dir trabayar a un centru nel que nin siquier van tar contrataos.

Nel casu’l profesoráu que nun llogre plaza na primer convocatoria, nun van poder completar el procesu d’evaluación del so alumnáu y el departamentu o la direición del centru va asumir la evaluación de los y les discentes.

Paez qu’a la Conseyería siguen prestándo-y los esperimentos. Dende va dellos años lleva desamarrando una reforma interna del seutor educativu, retayando los derechos de los y les trabayadores de la enseñanza, cebándose col profesoráu interín que sufrió la mayoría de los retayos y retayando derechos a les families.

Dende la Seición d’Educación de la Corriente Sindical d’Izquierda (CSI), espresamos el nuesu refugu a estes midíes y desiximos la ellaboración d’un nuevu calendariu d’entamu cursu con un procesu d’alxudicación de places tresparente, nel que les places ufiertaes cubran toles necesidaes de los centros dende un principiu asina comu nun tiempu razonable pa la organización de los centros y el so personal docente.

Esiximos la prórroga de los contratos del profesoráu de secundaria, garantizando asina’l procesu d’evaluación y los derechos inherentes al mesmu, como se vieno realizando hasta agora.

Por ello, afalámosvos a allegar el llunes 24 d’agostu a les 12:00h, delantre de la Conseyería d’Educación, pa esixir los nuesos derechos.

¡NUN SOMOS PROFESORÁU D’USAR Y TIRAR!