Un grupu de trabayadores del Plan d’empléu d’Uviéu eNTAMA aIciones llegales pa la conversión de los sos contratos fraudulentos n’indefiníos non fixos

Reclamen al Gobiernu minicipal uvieín “que actúe con celeridá y convierta n’indefiníos non fixos a estos y estes trabayadores, y que abra’l procesu necesariu pa que, mediante convocatoria pública d’empléu, eses places se conviertan n’indefiníes fixes”.

Un grupu trabayadores del Plan d’Empléu del Ayuntamientu d’Uviéu, col apoyu y asesoramientu de la Corriente Sindical d’Izquierda, decidió denunciar la illegalidá y fraude de llei nos contratos temporales de dichu Plan.

Fáese una reclamación nel Rexistru del Ayuntamientu d’Uviéu, previa a la demanda xudicial que va efectuase posteriormente si l’Ayuntamientu nun convierte dichos contratos temporales n’indefiníos.

Los Contratos por Obra o Serviciu, que son los que roblaron les y los trabayadores del Plan d’Empléu, son illegales dafechu porque tala “obra o serviciu” nun existe. Úsase la fuerza llaboral de dichu plan pa cubrir les actividaes y servicios que l’Ayuntamientu presta habitualmente en dellos sectores.

L’Ayuntamientu d’Uviéu aprovéchase d’una mano d’obra barata en condiciones d’absoluta precariedá y falta de derechos, pa cubrir puestos de trabayu que d’otra manera habríen d’axustase a convenios sectoriales manifiestamente meyores tanto en sueldu como en derechos, talu y como quedó manifiestamente afitao n’abondes sentencies recientes de los Xulgaos de lo Social de Xixón y del propiu Tribunal Superior de Xusticia d’Asturies tres les denuncies de decenes de trabayadores de los Planes d’Empléu de Xixón.

Añu tres añu vemos como nada de lo que venden nos planes d’empléu existe. La supuesta inserción llaboral ye un fraude, la mayoría de les y los trabayadores d’estos planes son persones cualificaes profesionalmente. Úsase ésta excusa pa pagar sueldos inrisorios (se cobra en netu menos del salariu mínimu interprofesional en dalgunes categoríes) y condiciones de trabayu ensin dengún derechu.

Dende la Corriente Sindical d’Izquierda creemos que l’Alministración Pública ha ser la primer que dea exemplu na creación d’empléu estable y de calidá, máxime en casos como’l d’Uviéu, onde anguañu gobierna un tripartitu que se diz “de progresu”, y nun siguir la tendencia agudizada exponencialmente pola crisis capitalista, onde los empresarios se aprovechen del gran númberu de persones en paru pa esplotar y sacar beneficiu a costa d’empléu precariu, mal pagáu y en condiciones d’esclavitú.

La CSI va acompañar en tou esti procesu burocráticu y llegal les xustes demandes de los y les trabayadores que tán anguañu contrataos illegalmente pol Ayuntamientu d’Uviéu, talu y como yá fizo dende l’entamu coles personas del Plan d’Empléu de Xixón que reclamaron los sos derechos, y reclama al tripartitu uvieín que actúe con celeridá y convierta n’indefiníos non fixos a estos y estes trabayadores, y que abra’l procesu necesariu pa que, mediante convocatoria pública d’empléu, eses places se conviertan n’indefiníes fixes.