14P Absolución: Asturies de pie camuda’l llugar de la concentración n’Avilés pola absolución de los procesaos na fuelga xeneral del 14P, pa la Cai La Cámara

XUEVES 27 AGOSTU. 19:30 h. CAI LA CÁMARA. AVILÉS. ASTURIES.

EL CONCEYU D’AVILÉS Y LA DELEGACIÓN DE GOBIERNU TORGUEN QUE LA CONCENTRACIÓN SE CELLEBRE NA PLAZA’L CONCEYU AVILESÍN.

Asturies en Pie convocara una concentración pa desixir l’absolución de los procesaos na fuelga xeneral del 14P, pal xueves 27 agostu na plaza’l Conceyu d’Avilés.

Sicasí, esti Conceyu ellaboró un informe desaprebando esta concentración y proponiendo que se cellebrara nuna fecha posterior. La Delegación de Gobiernu, abellugándose nesti informe, considera illícita la concentración y asina lo comunicó a Asturies en Pie.

Como argumentos a la escontra la cellebración d’esta concentración, l’informe’l Conceyu avilesín namás altricaba la esistencia d’un escenariu na plaza’l Conceyu y la cellebración d’un mercáu na fastera axacente.

Sicasí, nin el Conceyu d’Avilés nin la Delegación de Gobiernu apurren argumentos o causes que xustifiquen l’aplazamientu de la convocatoria por razones de seguranza ciudadana, interrupción de servicios esenciales o cualisquier otra causa de fuerza mayor.

Magar ello y con un ánimu de collaboración, Asturies en Pie camudó’l llugar de convocatoria pa la cai La Cámara, pero calteniendo la fecha y la hora, por considerar que nun hai razón dalguna pal aplazamientu de dicha concentración que, como anunciamos, queda convocada pal viniente xueves, 27 agostu, a les 19:30 h., na cai La Cámara d’Avilés.

En casu d’una nueva prohibición pela parte’l Conceyu d’Avilés y de la Delegación de Gobiernu, Asturies en Pie anuncia la so intención de recurrir dicha decisión énte’l Tribunal Superior de Xusticia d’Asturies, col finxu de salvaguardar los derechos fundamentales d’aconceyamientu y manifestación.