Asturies de pies esixe l’absolución de toles persones procesaes na Fuelga Xeneral del 14 N, con una gran pancarta na Casa sindical de Xixón

14N ABSOLUCIÓN

¡LA REPRESIÓN NUN VA PARAR LA LLUCHA DE LA CLAS OBRERA!

COMUNICÁU D’ASTURIES EN PIE:

El viniente 28 setiembre de 2015, van ser xulgaes 6 persones, ente elles, cuatro militantes de la Corriente Sindical d’Izquierda (CSI) y ún del FUSOA (Fondu xUnitariu de Solidaridá Obrera d’Asturies), con un pidimientu conxuntu de 12 años de prisión.

Na mañana’l día 14 payares de 2012, día en que taba convocada una xornada de fuelga xeneral, como protesta escontra los retayos de los nuesos derechos más básicos: trabayu, alimentos, vivienda, sanidá, educación, servicios sociales, etc., la CSI y la CGT entamen un piquete informativu pel centru Xixón.

La CSI moviliza a los y les sos militantes pa participar en dichu piquete y sumase, dempués, a la manifestación convocada pola izquierda sindical d’Asturies na Plaza L’Humedal.

Dende la xefatura de la comisaría de policía establecióse un dispositivu de seguridá, siendo escoltaos los piquetes polos antidisturbios o Unidá d’Intervención Policial (UIP), dende l’entamu.

El piquete trescurrió de forma pacífica, apurriendo panfletos informativos a los y les trabayadores que s’atopaben nos centros de trabayu abiertos.

A pocos metros de la Plaza L’Humedal, la policía detién a un militante de la CSI y, pol simple fechu d’entrugar polos motivos de la detención, el restu de miembros del piquete foi escorríu y cutíu de forma indiscriminada.

Asina entamó la primer carga policial, na cai Llangréu. De magar equí, el piquete dispérsase, llevando a los compañeros mancaos hacia la casa sindical pa face-yos les cures d’urxencia.

La policía llocal, pol cenciellu fechu de ver a persones correr, corta’l pasu con una patrulla y detién a trés persones de forma aleatoria. De siguío, los antidisturbios invaden la Casa Sindical de Xixón, de forma illegal dafechu, dexando a delles persones mancaes, que tuvieron de ser atendíes por unidaes móviles del SAMU.

En total, cuatro persones fueron deteníes y llevaes a comisaría. Otres dos persones resultaron imputaes posteriormente.

Estes detenciones prevocaron que miles de trabayadores, a la fin de la manifestación anantes mentada, arrodiaren la comisaría Xixón demientres delles hores, hasta la so puesta en llibertá.

De resultes de too ello, agora, seis persones enfréntense a xuicios con pidimientos fiscales d’un añu y seis meses de prisión pa trés d’elles y de dos años y cuatro meses, pa les otres trés. En total, un pidimientu fiscal de 12 años de prisión.

Sicasí, nin una sola de les denuncies interpuestes poles y polos militantes de la CSI afrellaos pola policía, foi siquier almitía a trámite, magar que los partes mélicos destacaben la gravedá de les mancadures que, en dalgún casu, riquieron d’intervención quirúrxica: un tabique nasal rotu, puntos de sutura a estremaes persones, contusiones y hematomes con tratamientos paliativos que duraron dellos meses, mancadures oculares, etc.

Nel conxuntu del Estáu español, son centenares los y les trabayadores condergaes o encarcelaes por participar nes estremaes convocatories de fuelga realizaes demientres estos años.

Equí, n’Asturies, ye necesariu recordar que, anguañu, esisten pidimientos de cárcel importantes. Amás de los pidimientos de prisión pa los encausaos nel 14-P, los 5 mineros de Zarréu atópense condergaos a prisión por socorrer a dellos compañeros accidentaos, otros 5 trabayadores d’Arcelor tán, asina mesmu, condergaos a prisión por participar nos piquetes informativos de la fuelga xeneral del 29M y, solamente dende Asturies en Pie, deféndese la causa de numberosos persones que, pola so participación nes movilizaciones llaborales y sociales, atropen pidimientos fiscales que, en xunto, pueden superar los 50 años de prisión.

Por too ello, dende Asturies en Pie tamos desendolcando una campaña pola absolución de los encausaos nel 14-P, demientres la cuala vamos realizar, ente otres, les movilizaciones que vienen darréu:

-El 18 setiembre: Concentración n’Avilés, a les 19:30 h., n’El Parche (plaza’l Conceyu).

-El 24 setiembre: Manifestación en Xixón pola absolución de los compañeros encausaos nel 14-P.

-El 28 de setiembre: Concentración de sofitu nos Xulgaos de Xixón, coincidiendo cola cellebración del xuiciu.