La CSI insta al Ayuntamientu de Xixón a regularizar la situación de los trabayadores y ex trabayadores de los Planes Inserta

CSI-PLAN INSERTA (XIXÓN)

En recientes declaraciones a la prensa pela parte de Carmen Moriyón, l’alcaldesa de Xixón reconocía públicamente que les contrataciones del Plan Inserta taben en fraude de llei, talu y como abondes sentencies de los Xulgaos de lo Social de Xixón y el Tribunal Superior de Xusticia d’Asturies asina lo determinaron nel so día, y que d’ello derivaríase un gastu pa les arques municipales de 3 millones d’euros, frutu de les demandes xudiciales que tán interponiendo trabayadores y ex trabayadores de los Planes Inserta 2013 y 2014.

Asinamesmo, l’alcaldesa anuncia una ronda contactos con sindicatos y Grupos municipales pa afitar les bases d’un nueu Plan d’Empleu que se convocaría el próximu mes de setiembre. Pa este nueu Plan d’Empleu prevése l’aprebación en Plenu Municipal d’una modificación presupuestaria por valor de 4,5 millones d’euros.
Dende la sección sindical de la Corriente Sindical d’Izquierda-Plan Inserta, queremos emplazar una vegada más tanto al Gobiernu Municipal, como al restu de grupos políticos presentes na Corporación Municipal y a los sindicatos con representación nel Ayuntamientu, a que pongan fin d’una vez por toes a esti despropósitu.

Nesti sen, dende CSI-Plan Inserta desiximos que se aprebe una modificación presupuestaria darréu que sirva pal pagu de les diferencies salariales reclamaes polos y les ex trabayadores del Plan Inserta y les indeminizaciones por despíu d’estes mesmes persones, ensin que se tenga que esperar a la pertinente resolución xudicial pa cada casu, pues yá ye más que notorio que estos y estes trabayadores tienen reconocíu esi derechu.

D’otru lláu, desiximos tamién, que yá que l’Ayuntamientu asume que los contratos son en fraude de llei, asuma la so responsabilidá y faiga a los y les trabayadores n’activo nel Plan Inserta n’indefiníos non fixos, y que se abra’l procesu necesariu pa convertir eses places en indefiníos fixos mediante convocatoria pública d’empleu.
Tamién queremos matizar y denunciar dalgunes informaciones recientes respecto a esti casu. Matizar los datos apurríos pol Ayuntamientu. Son yá 130 les demandes por reclamación salarial y 40 por despíu improcedente presentaes polos servicios xurídicos d’esti sindicatu, a les que se sumaríen les persones que demandaron por otres víes, y non 43 y 40 respectivamente como informa l’Ayuntamientu.

A lo cabero, queremos denunciar la hipocresía de PSOE, CCOO y UXT, creadores y cómplices d’esta illegalidá manifiesta nos Planes d’Empleu, y que nun actuaron en dengún momentu pa poné-y fin hasta que la CSI empezó tou’l procesu de denuncia pública y aiciones llegales fae dalgo más d’un añu.