Concentración pola absolución de los procesados pola Güelga Xeneral del 14 N

ASTURIES EN PIE: ¡14N ABSOLUCIÓN!

Asturies en Pie convoca una concentración pa desixir l’absolución de les persones encausaes pola so participación na fuelga xeneral del 14P. Esta concentración va tener llugar el viniente vienres 18 xunetu, a les 19:30 h., na plaza Padre Máximo González (frente a la entrada de la Selmana Negra), de Xixón.

El 28 setiembre de 2015, van ser xulgaos 6 trabayadores pola so participación nos piquetes informativos de la fuelga xeneral del 14-P, con un pidimientu conxuntu de más de 12 años de prisión. A dos trabayadores pídese-yos 1 añu y mediu de prisión pa caún y a otros cuatro, 2 años y mediu, tamién pa caún.

Cuatro d’ellos son militantes de la Corriente Sindical d’Izquierda y otru del FUSOA (Frente xUnitariu de Solidaridá Obrera d’Asturies). Asina mesmo, tres de los trabayadores son de Xixón y otros tres d’Avilés.

Demientres la fuelga xeneral del 14 payares de 2012, la UIP (los antidisturbios) cargaba ensin denguna xustificación sobre un piquete informativu de la CSI y la CXT ya invadíen la Casa Sindical de Xixón, de forma illegal dafechu, dexando a delles persones mancaes, que tuvieron de ser atendíes por xunidaes móviles del SAMU.

Cuatro persones fueron deteníes y otres dos, imputaes. El so delitu nun foi otru que participar nuna fuelga xeneral, entamada pa defender los derechos más básicos: trabayu, alimentos, vivienda, sanidá, educación, servicios sociales… A la fin, lo mínimo necesario pa llevar una vida digna.

Estes detenciones prevocaron que miles de trabayadores arrodiaren la comisaría de Xixón demientres delles hores, hasta la so puesta en llibertá.

De resultes de too ello, agora, seis persones enfréntense a xuicios con pidimientos fiscales que, en xunto, superen los 12 años de prisión. Sicasí, nin una sola de les denuncies interpuestes poles persones afrellaes pola policía, foi siquier almitía a trámite, magar que los partes médicos destacaben la gravedá de les mancadures que, en dalgún casu, precisaron d’intervención quirúrxica.

Pero nun ye l’únicu casu. Otros 5 trabayadores d’Arcelor, tán condergaos a prisión (pendientes de recursu énte l’Audiencia Provincial) pola so participación nos piquetes informativos de la fuelga xeneral del 29-M de 2012.

Nel conxuntu l’Estáu español, son centenares los y les trabayadores condergaes o encarcelaes por participar nes estremaes convocatories de fuelga realizaes demientres estos años.

Equí, n’Asturies, ye necesario recordar qu’anguañu esisten pidimientos de cárcel importantes. Amás de los pidimientos de prisión pa los encausaos nel 14-P, los 5 mineros de Zarréu atópense condergaos a prisión por socorrer a dellos compañeros accidentaos y, solamente dende ¡Asturies en Pie!, deféndese la causa de numberosos persones que, pola so participación nes movilizaciones llaborales y sociales, atropen pidimientos fiscales que, en xunto, pueden superar los 50 años de prisión.

Nel conxuntu d’Asturies, tamos falando de decenes y decenes de persones encausaes, que podríen atropar un pidimientu fiscal de más de 300 años de prisión, que ponen en xuegu non solamente los derechos básicos que se defenden, sinón el mesmu derechu a la protesta, el derechu a la fuelga y el derechu a participar en piquetes informativos.

Por too ello, dende Asturies en Pie, entamemos una campaña pola absolución de los encausaos nel 14-P, que va desendolcase demientres tol branu y va rematar con les movilizaciones que vienen darréu:

-El 18 setiembre: concentración n’Avilés.

-El 24 setiembre: manifestación en Xixón pola absolución de toles persones encausaes nel 14-P

-El 28 setiembre: concentración de sofitu nos Xulgaos de Xixón, coincidiendo cola cellebración del xuiciu.

(Formen parte de ¡Asturies en Pie!: CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU, CENTRU SOCIAL LA LLUME, ESPACIU LA LLEGRA, DARRÉU, MIERES EN LLUCHA).