La CSI y Asturies en pie realicen xestiones pa rabir el casu del accidente mineru de Zarréu

La Corriente Sindical d’Izquierda y Asturies en Pie tán realizando les xestiones alministratives necesaries pa reabrir una investigación nel casu del accidente asocedíu na mina de Zarréu, en xunetu 2012.

Tres los llabores de rescate en dichu accidente, algamóse sacar a los trabayadores atrapaos na mina. Pero, en llugar de xubilos nes ambulancies, qu’esperaben aparcaes a la boca la mina, un mandu de la empresa xubiólos a un vehículu pick up (un touterrén) pa empobinalos a la casa d’aséu y, d’esta forma, intentar tapecr la gravedá l’accidente.

Énte tal fechu, los trabayadores y vecinos y vecines presentes, interceptaron el vehículu del mandu la empresa nel que yeren treslladaos los accidentaos, pa xubilos a les ambulancies y que fueren trataos afechiscamente, lo que dio llugar a los incidentes polos que los 5 mineros de Zarréu fueron condergaos a dos años y mediu de prisión, caún.

Agora, la CSI y Asturies en Pie atópense pescanciando tolos informes esistentes alrodiu d’esti accidente, pa pescudar sobre la esistencia de posibles faltes de seguridá o incumplimientos de los protocolos a siguir en casos d’accidentes y rescates.

Pa la CSI y Asturies en Pie, ye necesariu abrir una investigación a xeitu, que de rempuesta a entrugues qu’inda nun se retrucaron:

¿Ye ciertu que’l día l’accidente taben realizándose trabayos d’estraición, a pesar de que se taba en dómina de fuelga, na que namás ta permitíu realizar trabayos de caltenimientu?. Y, nesi casu, ¿quién ordenó realizar estos trabayos d’estraición?.

¿Ye ciertu que s’utilizó goma-2 pa los trabayos de rescate, cosa prohibida dafechu?. Y, nesi casu, ¿quién ordenó’l el so usu?.

¿Por qué los trabayadores accidentaos fueron conducíos a los vestuarios nun coche d’empresa, en llugar de ser treslladaos nes ambulancies hacia un centru mélicu pa esaminar el so estáu de salú, dempués de permanecer un gran númberu d’hores atrapaos na mina?.

Por estes razones, na CSI y n’Asturies en Pie camentamos imprescindible que s’entame una investigación a xeitu sobre les causes del accidente de la mina de Zarréu, que s’asoleye lo que verdaderamente pasó aquel día y se depuren les responsabilidaes penales a qu’haya llugar, tantu pa la empresa como para’l mesmu capataz.

(Semeya de la ocupación de la sede la Direición de Seguridá Minera, per parte de la CSI y d’Asturies en Pie, pa desixir una investigación del accidente mineru de Zarréu).