Manifestación del Arguyu LGTB, ¡Igualdá social, yá!

Día 28 de xunu, una cita a la que la CSI nun puede faltar.

¡Tolos derechos pa toles persones!
¡Ante la represión y les discriminaciones, la nuesa solidaridá!

El día del Arguyu, ye un día pa conmemorar y pa faer memoria histórica. El día 28 de xunu, al igual qu’el 8 de marzu o’l 1 de mayu, ye un día que surdió con sangre. Sangre de la xente que nun se conformó y que nun se resignó. Sangre de les persones que namá ciscaben vivir a la so manera, querer a la so manera.
El 28 de xunu ye un día pa recordar a toles persones que llucharon y que siguen lluchando. Ye’l día en que, haya pel añu 1969, metanes los grandes movimientos proderechos civiles, en contra de la guerra, en contra del racismu, pola igualdá de les muyeres, el colectivu LGTB díxose que tamién tenía que lluchar polos sos derechos.
Nel barriu neoyorquín de Greenwich Village, nun pub conocíu como Stonewall Inn, dempués d’aguantar munches redaes, y de la muerte d’una paliza d’una drawing-queen, delles persones cansaes de ser triaes, vilipendiadas, reprimíes, maltrataes, asesinaes, ocultes, torturaes,…dixeron ¡Basta!
Lo que’l sistema llama “los disturbios de Stonewall” nun foi más que l’espertar como movimientu y como colectivu de les persones que pola so orientación o identidá sexual siempres taben apatayaes.
Pero aquel día, pasó daqué colo que la policía nun cuntaba, aquel día lxs trans xunieron les sos fuerces y nun dieron nin un pasu tras. Ante la violencia policial reaccionaron y zarraron a la policía nel mesmu pub onde siempres-yos maltrataben. Dieren la vuelta a la tortiella, y el fueu foi l’anunciu d’una nueva dómina. Nacía’l día del Arguyu.

Inda queda enforma camín pa la igualdá plena de toles persones, por eso siguimos lluchando tolos díes y glayando:

¡Si tóquennos a una, tóquennos a toes!
¡Tolos derechos pa toles persones!
¡Nenguna agresión ensin respuesta!