Concentración d’Asturies en pie n’Avilés, contra la llei mordaza

Asturies en Pie convoca una concentración escontra la Llei Mordaza, que va tener llugar el viniente vienres 26 de xunu, a les 19:30 h. n’El Parche (plaza’l Conceyu) d’Avilés.

Esta concentración forma parte de la campaña de llucha escontra la represión y la Llei Mordaza, desendolacada por Asturies en Pie, que va continuar el viniente martes 30 xunu, con una xornada de llucha n’Asturies escontra la Llei Mordaza. Esta xornada de llucha va rematar con una manifestación que va salir a les 19:30 h. de la plaza L’Humedal de Xixón.

P’Asturies en Pie, les resultancies eleutorales son nidios: el PP nun tien llexitimidá pa siguir llexislando absolutamente nada. Muncho menos pa imponer una Llei Mordaza que, na práutica, desanicia la totalidá de los nuesos derechos y llibertaes públiques.

Les nueves mayoríes polítiques tienen, en cada Parllamentu y en cada Conceyu, una xera urxente que llevar a cabu: torgar que la Llei Mordaza y la reforma’l Códigu Penal entren en vigor.

Por ello, Asturies en Pie ta en contautu con otres organizaciones (sindicatos, movimientos sociales, coleutivos antirrepresivos, etc.) d’estremaes fasteres del Estáu español, pa intentar qu’esta xornada de llucha nun se quede solo n’Asturies, sinón que s’esparda a cuantos territorios del Estáu quieran participar.

D’esta forma, n’Aragón el sindicatu Colectivu Unitariu de Trabayadores (CUT) y el colectivu Derechos Civiles, van realizar un conciertu reivindicativu’l día 27 xunu, escontra la llei mordaza y pola municipalización de los servicios públicos.

Pela so parte, el Bloque Unitariu de Madrid convocó, tamién el día 30 xunu, una manifestación escontra la Llei Mordaza.

Por tou ello, afalamos a tol pueblu asturianu a xunir fuerces en cada barriu, en cada pueblu y en cada ciudá, pa realizar tou tipu de movilizaciones y actos públicos de protesta, ellí onde síamos capaces.

(Formen parte de ¡Asturies en Pie!: CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU, CENTRU SOCIAL LA LLUME, ESPACIU LA LLEGRA, DARRÉU, MIERES EN LLUCHA).).