Asturies y pie reclama a los grupos municipales y parlamenarios asturianos, una declaración pública contra la entrada a valir de la Llei mordaza y la reforma del códigu penal

ASTURIES EN PIE RECLAMA A LOS GRUPOS MUNICIPALES Y PARLLAMENTARIOS ASTURIANOS, UNA DECLARACIÓN PÚBLICA CONTRA LA ENTRADA A valir DE LA LLEI MORDAZA Y LA REFORMA DEL CÓDIGU PENAL

Asturies de pies ta reclamando a los grupos municipales de los conceyos asturianos y a los grupos parllamentarios de la Xunta Xeneral, un pronunciamientu públicu escontra la entrada en vigor de la Llei Mordaza y la Reforma’l Códigu Penal.

D’esta forma, Asturies en Pie, ta faciendo llegar a tolos grupos municipales y parllamentarios que-y ye posible, el documentu que vien darréu:

Como sabéis, el viniente día 1 de xunetu de 2015 van entrar en vigor la Llei de Seguridá Ciudadana, popularmente conocida como Llei Mordaza, y la Reforma’l Códigu Penal, impulsaes y aprebaes pol Gobiernu’l Partíu popular.

Dambes normes debuxen un panorama xurídicu que desanicia, na práutica, tolos nuesos derechos y llibertaes públiques.

Y ello, hasta tal puntu que la ONU yá realizó declaraciones nes que “s’apura al Estáu español a retirar la Llei Mordaza porque amenacia con violar los derechos y llibertaes fundamentales de les persones y fraya la mesma esencia del derechu manifestación”.

Coles mesmes, el Conseyu d’Europa tamién solicitó la so retirada por “atentar escontra del derechu de xunta y de manifestación y frayar los derechos fundamentales”.

Pela so parte, delles asociaciones de la judicatura, la fiscalía y l’abogacía yá s’amosaron a la escontra de la so entrada en vigor.

Igualmente, tolos grupos parllamentarios, sacante CiU y PNV, roblaron un recursu d’inconstitucionalidá escontra la Llei Mordaza, que foi almitíu a trámite pol Tribunal Constitucional.

Amás d’ello, les últimes resultancies eleutorales son nidies: el Partíu Popular nun tien llexitimidá pa siguir llexislando absolutamente nada. Muncho menos pa imponer una Llei Mordaza que, na práutica, desanicia la totalidá de los nuesos derechos y llibertaes públiques.

Coles mesmes, les nueves mayoríes polítiques tienen una xera urxente que llevar a cabu: torgar que la Llei Mordaza entre en vigor.

Por too ello, dende les organizaciones sindicales y coleutivos sociales que formamos parte de Asturies de pies, pidímosvos qu’el vuesu Grupu Municipal o Parllamentariu, yá sía en solitariu, en collaboración con otros grupos o al traviés d’una declaración conxunta del Plenu, faigáis una declaración pública na que se sopelexe:

-La vuesa oposición a la entrada en vigor de la Llei Mordaza y la Reforma’l Códigu Penal.

-El vuesu enfotu de torgar, por tolos medios llegales al vuesu algame, que, tanto los Conceyos como la Xunta Xeneral, collaboren na aplicación de la Llei Mordaza y la Reforma’l Códigu Penal.

En nome de les organizaciones y coleutivos que formen Asturies en Pie: CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU, CENTRU SOCIAL LA LLUME, ESPACIU LA LLEGRA, DARRÉU, MIERES EN LLUCHA.